Tags-Musafir

vo raat kā be-navā musāfir vo terā shā.ir vo terā 'nāsir'
tirī galī tak to ham ne dekhā thā phir na jaane kidhar gayā vo

laḌnā hai tujhe shab ke añdheroñ se musāfir
sūraj kahāñ niklā hai abhī jāgte rahnā

musāfir-e-abadī kī nahīñ koī manzil
yahāñ qayām kiyā yā vahāñ qayām kiyā

musāfir ishq kī manzil sarāpā raaz hotī hai
kahīñ chehre pe gard-e-kārvāñ baaqī na rah jaa.e

koī musāfir hī ruk jaa.e pal do pal ke liye
muddat se vīrān hai Derā koī nahīñ merā

jo manzil hī se ho ġhāfil musāfir
bhalā kyā lutf jo raushan nazar hai

kyuuñ na lauTe vo udāsī kā musāfir yaaro
zaḳhm siine ke use roz sadā dete haiñ

havā-e-vādi-e-dushvār se nahīñ ruktā
musāfir ab tire inkār se nahīñ ruktā

ābād rahe shahr-e-ḳhamoshāñ kise ma.alūm
mujh aisā musāfir yahāñ kis pal nikal aa.e

us musāfir kī naqāhat kā Thikāna kyā hai
sañg-e-manzil jise dīvār nazar aane lage

ye jism faqat ek taraf kā hai musāfir
jā kar phir usī jism meñ aane ke nahīñ ham

ḳhizr hai bahrī musāfir kā manār-e-raushnī
hai jahāzoñ ke liye rahbar dhuāñ battī charāġh

dil TuuT chukā tār-e-nazar TuuT rahā hai
qistoñ meñ musāfir kā safar TuuT rahā hai

miTe par bhī vahī hai rahnumā.ī kā asar is meñ
musāfir ko hamārī ḳhaak bhī sattā batātī hai

nagrī nagrī phirā musāfir ghar kā rastā bhuul gayā
kyā hai terā kyā hai merā apnā parāyā bhuul gayā

ham musāfir haiñ sulagtī dhuup jaltī raah ke
vo tumhārā rāsta hai jis meñ āsānī bhī hai

kuchh TuuTe phaTe siine ko saath apne safar meñ
kyā vo bhī musāfir jo na rakkhe suī taagā

ye zindagī kā musāfir ye be-vafā lamha
chalā gayā to kabhī lauT kar na aa.egā

kaun duniyā meñ rahe dīvāna hai
ek ujḌā sā musāfir ḳhāna hai

ye dariyā hai guzar jaanā hai is ko
musāfir ho tum apnā rāsta lo