Tags-Musafir

chal rahe haiñ dil meñ naḳhlistān kā armāñ liye
ham musāfir zindagī ke tapte registān ke

tirī sarā.e meñ sāmāñ kahāñ sukūn kā thā
kisī tarah se musāfir bhī shab guzār ga.e

apnī jhūTī anā kī bātoñ meñ aa ke us ko sulā to baiThe haiñ
ab haiñ sahrāoñ ke musāfir ham aur vo sūrat sarāb kī sūrat

ajnabī musāfir ko rāsta dikhā.egā
kaun apnī chaukhaT par ab diyā jalā.egā

bhūla-bhaTkā sā musāfir koī shāyad mil jaa.e
do qadam chalte haiñ āvāz lagā lete haiñ

chalā jo shab kā musāfir to is adā se chalā
ki jab rukā to dar-e-sub.h rūnumā na huā

ik rañj meñ Duubā huā be-nām musāfir
aayā thā baḌī duur se Thahrā mire dil meñ

dil ajab shahr ki jis par bhī khulā dar is kā
vo musāfir ise har samt se barbād kare

adam kī jo haqīqat hai vo pūchho ahl-e-hastī se
musāfir ko to manzil kā patā manzil se miltā hai

ḳhush haiñ to phir musāfir-e-duniyā nahīñ haiñ aap
is dasht meñ bas ābla-pā.ī hai roiye

bārish hogī to bārish meñ donoñ mil kar bhīgeñge
ret pe ek musāfir kā ghar aur samundar bhīgeñge

jab pukārā kisī musāfir ne
rāste khā.īyoñ meñ chīḳh uThe

sab musāfir haiñ na.ī raah kī sab ko hai talāsh
sab pe mumkin to nahīñ rāh-e-digar khul jaa.e

haiñ azm-e-musāfir ke aage ḳhatrāt masāfat hech bahut
manzil kī talab hai dil meñ agar ho rāhguzar dushvār to kyā

ai ruuh na ho jaa.e kahīñ jism-e-girāñ aur
ghabrā.e musāfir to badaltā hai makāñ aur

mujh ko afsos hai maiñ judā ho rahā huuñ magar
ai musāfir mujhe terī sab nekiyāñ yaad haiñ

rāsta pagDanDiyoñ meñ baT gayā
ik musāfir ke ka.ī phere hue

bahut hai raat añdherī magar chale hī chalo
ki aap apne musāfir ko DhūñD legī kiran

khone kī tujhe mujh ko vahī fikr hai lāhiq
hotī hai musāfir ko jo sāmān ke baare

us kī manzil tak na pahuñchā ek bhī
sab musāfir rāste meñ rah ga.e