Tags-Naaz

maiñ naaz kyuuñ na karūñ apne TuuTe ḳhvāboñ par
ki ḳhud-kushī bhī inhoñne ḳhushī ḳhushī kar lī

sharm ik adā-e-nāz hai apne hī se sahī
haiñ kitne be-hijāb ki haiñ yuuñ hijāb meñ

nigāh-e-nāz kā rishta jo dil ke ghaav se hai
ye āb-o-rañg-e-tamannā isī lagāv se hai

thā naaz bahut ham ko dānist par apnī bhī
āḳhir vo burā niklā ham jis ko bhalā jaanā

vo bhī din the ki bahut naaz thā apne uupar
aaj ḳhud apnī hī auqāt pe ronā aayā

kis nazar-nāz ne us baaz ko baḳhshī parvāz
saiñkaḌoñ murġh havā phāñd ke par baiTh ga.e

qadam uThe bhī nahīñ bazm-e-nāz kī jānib
ḳhayāl abhī se pareshāñ hai dekhiye kyā ho

tajrabe suuñ huā mujhe zāhir
naaz mafhūm be-niyāzī hai

'salmān' phir chalā hai usī bazm-e-nāz meñ
kam-zarf apne baal sañvāre ghaḌī ghaḌī

ai raḳhsh-e-nāz muḌ ke zarā dekh to sahī
yādoñ ke dar se kaun pukāre ghaḌī ghaḌī

uThā ke naaz se dāman bhalā kidhar ko chale
idhar to dekhiye bahr-e-ḳhudā kidhar ko chale

Tapaktī haiñ ḳhirām-e-nāz se rañgīniyāñ sau sau
mujhe Dar hai ki ye duniyā simaT kar dil na ho jaa.e

vaqt-e-ḳhirām-e-nāz dikhā do judā judā
ye chaal hashr kī ye ravish āsmāñ kī hai

zulmat-e-jumbish-e-lab kī nahīñ ummīd magar
nigah-e-nāz na bhūlegī ishārā karnā

vo aate haiñ 'shakīl' ab apne dil se haath dho baiTho
nigāh-e-nāz kī qīmat adā karne kā vaqt aayā

mujhe naaz apne ḳhayāl par mujhe naaz us ke jamāl par
maiñ samajh rahā huuñ jise nayā vo nayā na ho kahīñ yuuñ na ho

'anjum' ko hāfize pe bahut apne naaz hai
khātā hai kis anaaj ke daane patā karo

vo mast-e-nāz-o-adā jis ko roz va.ade ke
shikast-e-jām o shikast-e-qasam barābar hai

gul-fishānī-hā-e-nāz-e-jalva ko kyā ho gayā
ḳhaak par hotī hai terī lāla-kārī haa.e haa.e

vo jalva-gāh-e-nāz vo maḳhmūr nigāheñ
ab kyā kahūñ ye lamhe kahāñ maiñ ne guzāre