Tags-Naaz

jo havā-e-dard bikhar ga.ī nazar un kī saaf badal ga.ī
jo asīr-e-halqa--nāz the vo qatīl-e-teġh-e-adā hue

is tarah duniyā hai ik ma.amūra-e-nāz-o-niyāz
zarre zarre par mirā sajda tumhārā naam hai

maar le vo nigah-e-nāz to rutba ho buland
sar ho ūñchā mirā gar nok-e-sināñ tak pahuñche

har qadam par jis ke ejāz-e-masīhā.ī fidā
us adā us naaz us raftār ke qurbān ham

ye adam vajūd kyā hai tirā naaz hai musavvir
kisī naqsh ko miTāyā kisī naqsh ko ubhārā

tujh ko dekhā na tire nāz-o-adā ko dekhā
terī har tarz meñ ik shān-e-ḳhudā ko dekhā

skyāñ sā.īñ chhand suuñ pañvā.e apas
tuman husn ke tiiñ so uu naaz hai

yaañ iltimās-e-shauq vahāñ ehtirāz-e-nāz
mushkil huī thī ohda-barā.ī tamām shab

ham par bhī rahguzār-e-mohabbat ko naaz hai
ham ne bhī kuchh nuqūsh miTā kar banā.e haiñ

ye naaz hai yā istiġhnā hai yā tarz-e-taġhāful hai yaaro
jo laakh koī taḌpe siske fariyād kare kuchh dhyān nahīñ

javānī ke nishāñ andām se hone lage zāhir
mubārak ho bahār ai sard baaġh naaz aatī hai

dam-e-raftār-e-jānāñ ye sadā-e-nāz aatī hai
sambhāleñ sab diloñ ko paañv kī āvāz aatī hai

tab uThe haiñ un butoñ ke ham se naaz
jab kalejā apnā patthar kā kiyā

bhartā hai aaj ḳhuub tarāre samand-e-nāz
qumchī hai un ke haath meñ zulf-e-siyāh kī

laakh māshūq haiñ jahāñ meñ magar
aah vo naaz vo adā hī nahīñ

hai nāz-e-muflisāñ zar-e-az-dast-rafta par
huuñ gul-farosh-e-shoḳhi-e-dāġh-e-kohan hunūz

ishq kī aag ne jalvaoñ ko javāñ rakkhā hai
log baaqī haiñ abhī naaz uThāne vaale

yaqīnan vaj.h-e-baḳhshish nāz-e-umr-e-bandagī hotā
kiyā hotā agar shāyān-e-dar ik sajda bhī maiñ ne

dar-e-ka.aba ho pā-e-nāz ho sar rakh diyā ham ne
kahāñ ye shauq-e-sajda dekhtā hai rū-ba-rū kyā hai

ye bhī adā-e-nāz thī vo bhī adā-e-nāz
machleñ jo shoḳhiyāñ nigah-e-sharm-sār meñ