Tags-Naaz

tā na paḌe ḳhalal kahīñ aap ke ḳhvāb-e-nāz meñ
ham nahīñ chāhte kamī apnī shab-e-darāz meñ

aisā lagtā hai ki bazm-e-nāz meñ tanhā huuñ maiñ
chashm-e-bīnā ho to hai vo bazm-ārā.ī ki bas

maiñ ki ḳhvāb-e-nāz meñ āsūda shab hone ko thā
sūr-e-isrāfīl kī aisī sadā aa.ī ki bas

nigāh-e-nāz meñ dil-sozī-e-niyāz kahāñ
ye āshnā-e-nazar haiñ diloñ ke begāne

us nigāh-e-nāz ko apnī taraf samjhā kiye
munkashif phir ye huā ham the nazar nā-āshnā

vo kyoñ jaane lagā dair-o-haram kī Thokareñ khāne
tire 'afqar' ko tere mai-kade par naaz hai saaqī

jabīn-e-shauq sajda kar kahāñ kā pās-e-rusvā.ī
ḳhushā-vaqte ki sargarm-e-ḳhirām-e-nāz hai saaqī

ai nāz-e-ḳhud-ārā.ī de zarf ko pahnā.ī
ghuTtā huā qatre meñ dariyā nazar aatā hai

tū ne kis naaz se dekhā thā azal meñ in ko
aaj tak hosh meñ dīvānoñ se aayā na gayā

sehn-e-chaman ko apnī bahāroñ pe naaz thā
vo aa ga.e to saarī bahāroñ pe chhā ga.e

yahī baat kah do pukār ke vahī silsile raheñ pyaar ke
isī naaz meñ rahe phir bharam ki fareb meñ bhī yaqīn ho

ḳhair-maqdam ke liye band darīche kholo
nāz-o-andāz se kis shaan se aatī hai havā

vo kis nāz-o-andāz se kah rahe haiñ
'shakīl' ab mohabbat ke qābil nahīñ hai

kuchh tire nāz-o-sitam aur uThānā chāhe
dil mirā aql se phir aañkh churānā chāhe

huī yā mujh se nafrat yā kuchh is meñ kibr-o-nāz aayā
kabhī vo muskurā detā thā ab is se bhī baaz aayā

nigāh tez nafas garm aarzū bebāk
jise ho naaz hamāre huzūr aa jaa.e

qatre araq-e-jism ke motī kī laḌī
hai paikar-e-nāz ki phūloñ kī chhaḌī

ka.ī din se ham bhī haiñ dekhe use ham pe naaz o itaab hai
kabhī muñh banā kabhī ruḳh phirā kabhī chīñ-jabīñ pe shitāb hai

rusvā agar na karnā thā aalam meñ yuuñ mujhe
aisī nigāh-e-nāz se dekhā thā kyuuñ mujhe