Tags-Naaz

karegā naaz taḌapne meñ ham se kyā bismil
kamī-e-dard-e-jigar vaañ nahīñ to yaañ bhī nahīñ

tum parī kā faḳhr ho hūroñ kā naaz
kaash hote firqa-e-insān meñ

ek chupkī meñ gulū tum ne nikāle sab kaam
ġhamza aayā na karishma na tumheñ naaz aayā

paas apne jo nayā koī fusūñ-sāz aayā
ho rahe us ke hameñ yaad tirā naaz aayā

jab tak hai diloñ meñ sachchā.ī sab nāz-o-niyāz vahīñ tak haiñ
jab ḳhud-ġharzī aa jaatī hai jul hote haiñ ghāteñ hotī haiñ

jo naaz hai vo apnātā hai jo ġhamza hai vo lubhātā hai
in rañg-birañgī pardoñ meñ ghātoñ par ghāteñ hotī haiñ

ohde se mad.h-e-nāz ke bāhar na aa sakā
gar ik adā ho to use apnī qazā kahūñ

chal diyā naaz zamāne ke uThāne vaalā
saare ghar le gayā ghar chhoḌ ke jaane vaalā

mādar-e-dahr uThātī hai jo har dam mire naaz
us ke dāman pe maiñ tiflāna machal jaatā huuñ

hai un ko naaz parda-e-māh-o-nujūm par
kaise kahūñ ki saaf nazar aa rahe ho tum

hameñ bhī naġhmagarī par hai naaz baat to kar
hameñ bhī jaañ nahīñ pyārī hai imtihāñ bhī to ho

qatīl-e-nāz huuñ ai vā-e-e'timād-e-vafā
vo iltifāt kare pahle bad-gumāñ bhī to ho

ai tarah-dār-e-ishva-tarāz-e-dayār-e-nāz
ruḳhsat huā huuñ tere liye dil-galī se maiñ

javānī ne diye haiñ un ko lā kar ham-nashīñ kyā kyā
adā meñ naaz chitvan meñ hayā āñkhoñ meñ mastī hai

naaz kartī hai ḳhāna-vīrānī
aise ḳhāna-ḳharāb haiñ ham log

naaz se rūThnā phir un kā manānā mujh ko
yaad aane lagīñ rah rah ke vo saarī bāteñ

har chand nāz-e-husn pe ġhālib na aa sake
kuchh aur mārke haiñ jo sar kar rahe haiñ ham

ham us nigāh-e-nāz ko samjhe the neshtar
tum ne to muskurā ke rag-e-jāñ banā diyā

dil kā kyā haal kahūñ sub.h ko jab us but ne
le ke añgḌā.ī kahā naaz se ham jaate haiñ