Tags-Naaz

naaz uThātā hai nāznīnoñ ke
dil bhī ho jaa.e nāznīñ na kahīñ

ḳhūbī-o-shān-e-dil-barī ġhamza-e-nāz hī nahīñ
husn meñ vo adā bhī hai jis kā nahīñ hai koī naam

sukūt-e-nāz ne iz.hār kar diyā jis kā
vo ek baat thī pairāya-e-bayāñ se alag

us nigāh-e-nāz ko to koī kuchh kahtā nahīñ
aur mohabbat kī nazar badnām ho kar rah ga.ī

bhulā diye ġham-e-duniyā ne ishq ke ādāb
kisī ke naaz uThāne kī fursateñ bhī ga.iiñ

dil harīm-e-nāz se le kar to ham nikle magar
ho gayā aalam kuchh aisā sab se begāna huā

dil-e-nā-subūr ke vāste koī naqsh-e-nāz bachā nahīñ
ye jahān-e-tāza ye asr-e-nau jise dekhiye tah-e-āb sā

samajh ke huur baḌe naaz se lagā.ī choT
jo us ne aa.ina dekhā to ḳhud hī khaa.ī choT

ham bhī tañg aa hī ga.e āḳhir niyāz o naaz se
haañ ḳhushā qismat ki un kī mehrbānī ho chukī

dil nazr karo zulm saho naaz uThāo
ai ahl-e-tamannā ye haiñ arkān-e-tamannā

kis jā karegā mayyat-e-ushshāq dafn tū
yaañ hai shahīd-e-nāz kī turbat bharī huī

bahkī bahkī nigah-e-nāz ḳhudā ḳhair kare
husn meñ ishq ke andāz ḳhudā ḳhair kare

na pūchh nāz-o-niyāz us ke mere kab se haiñ
ye husn o ishq to ab hai use zamāna huā

un kī nigāh-e-nāz ke qābil kaheñ jise
vo jins-e-mo'atabar ho atā dil kaheñ jise

hamsā.egī pe us kī bahut naaz hai hameñ
dīvār se lagī huī dīvār bhī nahīñ

ise kab nāz-e-bustāñ kī havas hai
ye dil nit kushta-e-ġhabġhab rahā hai

mujh ko 'matīn' naaz hai apne nasīb par
maiñ banda-e-nasīr huuñ maiñ ḳhādim-e-niyāz

ham ne kahā jab nāz-e-butāñ ke tum to bahut kaam aa.e 'nazīr'
sun ke kahā kyā aa.e jī haañ kuchh but ke muāfiq kaam kiyā