Tags-Naaz

sadqe ai tamkanat-e-nāz dikhā de mujh ko
haa.e vo aañkh na ho jis meñ muravvat merī

aa ke Thukrā ga.e kis naaz se turbat merī
na khulī aañkh mirī haa.e rī ġhaflat merī

naaz kyā is pe jo badlā hai zamāne ne tumheñ
mard haiñ vo jo zamāne ko badal dete haiñ

dekhnā mujh ko jo bargashta to sau sau naaz se
jab manā lenā to phir ḳhud ruuTh jaanā yaad hai

ik nigāh-e-nāz par qurbāñ kare hosh-o-ḳhirad
ishq-bāzī ke liye farzāna aisā chāhiye

surāhī kā bharam khultā na merī tishnagī hotī
zarā tum ne nigāh-e-nāz ko taklīf dī hotī

tere samand-e-nāz kī bejā sharārteñ
karte haiñ aag nāla-e-andesha-kām ko

parda nigāh kā hai to kaisī ḳhusūsiyat
apnī nigāh-e-nāz se pardā na kījiye

kashish mirī yahīñ manzil ko khīñch lā.egī
yahī to naaz hai mujh ko shikasta-pā huuñ maiñ

batā ai zindagī tere parastāroñ ne kyā paayā
uThā kar naaz tere nāz-bardāroñ ne kyā paayā

mat tabaḳhtūr se guzar qumrī hamārī ḳhaak par
ham bhī ik sarv-e-ravāñ ke nāz-bardāroñ meñ the

payām-e-dāvat-e-mai nīm-bāz āñkhoñ se
nigāh-e-nāz kī rañgīniyāñ are tauba

vo mast-e-nāz husn maiñ sarshār-e-ārzū
vo iḳhtiyār meñ haiñ na maiñ iḳhtiyār meñ

use dekhne kī thī aarzū mujhe us kī thī baḌī justujū
magar us ke āriz-e-nāz pe mirī har nigāh phisal ga.ī

naaz bhalā kis baat kā tujh ko pās-e-hunar jab kuchh bhī nahīñ
manzil par pahuñchegā kaise raḳht-e-safar jab kuchh bhī nahīñ

maiñ bhī faanī tū bhī faanī saarā aalam faanī hai
kyā ḳhad-o-ḳhāl pe naaz kareñ duniyā meñ amar jab kuchh nahīñ