Tags-Aib

ham un ke aib ko kyā aur kyuuñ ayaañ karte
jo be-zamīr the vo ḳhud hī be-naqāb hue

kisū ke ablaq-e-ayyām chaḌhne kā nahīñ raazī
azal se 'hātim' is tausan meñ aib-e-bad-rikābī hai

mahloñ ke sunahrī pardoñ meñ har aib hunar ban jaatā hai
lekin in daulat-mandoñ ko jhuTlāne kī jur.at kaun kare

ḳhāl-o-ḳhat se aib us ke rū-e-aqdas ko nahīñ
husn hai mus.haf meñ honā nuqta-e-e.arāb kā

dekho apne aib 'zafar'-jī
kaise haiñ ahbāb na dekho

garche tum taaza gul-e-gulshan-e-ra.anā.ī ho
phir bhī ye aib hai ik tum meñ ki harjā.ī ho

be-dard hai insāñ to haiñ sab is ke hunar aib
hai dil meñ agar dard to har aib hunar hai

dushman pe bhī nigāh rahe aib-bīñ hai vo
ye kyā ki sirf chāhne vāloñ ko dekhiye

na sune aur na hargiz dekhe
dostoñ meñ ho agar aib bhī aah

dekhā baġhaur aib se ḳhālī nahīñ koī
bazm-e-jahāñ meñ sab haiñ ḳhudā ke sañvāre log

sab tarah se to vo achchhe haiñ par achchhe kyā haiñ
ik yahī aib hai kaisā ki vafādār nahīñ

allāh 'shād' ġhair kī ye aib-jūiyāñ
tū ḳhud pe kar nigāh zarā sar se paañv tak

ra.anā.iyoñ ke lab pe mukarrar savāl hai
be-aib ḳhadd-o-ḳhāl tumheñ kaun de gayā

burī ḳhabar hai use mushtahar nahīñ karte
kisī ke aib ko yuuñ be-hunar nahīñ karte

ye sādgī ye najābat jo aib haiñ mere
sunā thā in pe to nasleñ guzārā kartī haiñ

maiñ apne matlab kī kah rahā huuñ vo ā.ina-rū ik aib meñ hai
bhalā ho milne kī ḳhaak sūrat savāl dīgar javāb dīgar

tavajjoh apnī ho kyā fann-e-shā.irī kī taraf
nazar har ek kī jaatī hai aib hī kī taraf

ho jahāñ aib-shumārī hī parakh kā mafhūm
sābir us shahr meñ kyā dād-e-hunar māñge hai

shart salīqa hai har ik amr meñ
aib bhī karne ko hunar chāhiye

ranjisheñ sab chhoḌ diiñ sab se laḌā.ī chhoḌ dī
aib thā sach bolnā maiñ ne burā.ī chhoḌ dī