Tags-Aib

dekhe jo koī sāda-mizājī to ye samjhe
vāqif hī nahīñ aap kisī aib-o-hunar se

ai mirī jaan aib hai ye bhī
ham ko maiñ tum ko tū karoge tum

apne chehre kī ḳhabar jin ko nahīñ hai 'afsar'
un kī āñkhoñ pe sabhī aib ayaañ haiñ apne

be-vafā ḳhudā se Dar ta.ana-e-vafā na de
'tājvar' meñ aur aib kuchh hoñ be-vafā nahīñ

ḳhūbiyoñ ko masḳh kar ke aib jaisā kar diyā
ham ne yuuñ aiboñ kī ābādī ko duunā kar diyā

is se behtar mirī tasvīr nahīñ ho saktī
zāt-e-be-aib se taqsīr nahīñ ho saktī

jo sach kahūñ to mohabbat-shi.ār 'ajmal' meñ
hazār aib sahī aadmī burā bhī nahīñ

gor-e-majanūñ se na jāveñge kahīñ ham be-navā
aib hai ham meñ jo chhoḌeñ Dher apne piir kā

mujh meñ hai yahī aib ki auroñ kī tarah maiñ
chehre pe kabhī dūsrā chehrā nahīñ rakhtā

aib terā kahāñ chhupegā ab
shahr meñ be-shumār āñkheñ haiñ

tamām aib mujhī ko dikhā.ī dete haiñ
so mere dost mujhī ko ajab samajhte haiñ

zalīl hote haiñ aib haiñ ḳhud jo aib us meñ nikālte haiñ
unhīñ ke uupar hī ḳhaak paḌtī jo chāñd par ḳhaak Dālte haiñ

sameT kar mujhe rakh le ki terā dard huuñ maiñ
tirā hī aib huuñ mujh ko chhupā ke ghar le jā

'qā.em' maiñ iḳhtiyār kiyā shā.irī kā aib
pahuñchā na koī shaḳhs jab apne hunar talak

na saare aib haiñ aib aur hunar hunar bhī nahīñ
kuchh ehtiyāt to kiije par is qadar bhī nahīñ

apnā dīvān muraqqa.a hai hasīnoñ kā 'jalīl'
nukta-chīñ thak ga.e kuchh aib nikāle na ga.e