Tags-Aib

husn meñ tere koī aib nahīñ
qubah meñ dañg rahā kartā hai

dekhe hunar jo apne hī vo jaane us kā kaam
ham ko to aib dekh ke apne hunar mile

āñkhoñ meñ be-hunar kī khaTaktā hai ban ke aib
ye ik ajiib baat kamāl-e-hunar meñ hai

ifshā-e-rāz-e-dil to baḌā aib hai magar
ho gar adab ke saath to dāḳhil hunar meñ hai

mujhe pata to chale mujh meñ aib haiñ kyā kyā
vo aa.ina hai to maiñ us ke rū-ba-rū ho jā.ūñ

dost har aib chhupā lete haiñ
koī dushman bhī tirā hai ki nahīñ

sach hai is ek parde meñ chhupte haiñ laakh aib
ya.anī janāb-e-shaiḳh kī dāḌhī darāz hai

aib auroñ ke DhūñDte haiñ ham
apne afa.āl par nazar na huī

ik din vo mere aib gināne lagā 'farāġh'
jab ḳhud hī thak gayā to mujhe sochnā paḌā

mat pūchhiye chālākiyāñ merī ki mirā aib
ab ahl-e-nazar ko bhī dikhā.ī nahīñ detā

aib dīvār ke hoñge zāhir
merī tasvīr haTā dī ga.ī hai

aap kī kam-nigahī husn bhī hai aib bhī hai
log aisā bhī samajhte haiñ ki kam dekhte haiñ

bahut sī ḳhūbiyāñ haiñ aa.ine meñ māntā huuñ maiñ
magar ik aib hai kam-baḳht meñ chehrā dikhātā hai

be-dilī se baat karnā guftugū kā aib hai
mast-hāloñ kī tabī.at ḳhush-dilī se pūchhnā

kisī sanad kī zarūrat nahīñ paḌī hai 'zafar'
hamārā aib hī āḳhir hunar hamārā huā

chashm-poshī se riyā-kārī ko shah miltī rahī
aib-poshī ko sharāfat kā bharam kahte rahe

jab us kā bosa letā thā cigarette kī bū nathnoñ meñ ghus jaatī thī
maiñ tambākū-noshī ko ik aib samajhtā aayā huuñ

allāh 'shād' ġhair kī ye aib-jūiyāñ
tū ḳhud pe kar nigāh zarā sar se paañv tak

kisī ke aib chhupānā savāb hai lekin
kabhī kabhī koī parda uThānā paḌtā hai

shart salīqa hai har ik amar meñ
aib bhī karne ko hunar chāhiye