Tags-Neend

roz uḌā de niiñd
talḳhī bharā ik ḳhvāb

na niiñd aur na ḳhvāboñ se aañkh bharnī hai
ki us se ham ne tujhe dekhne kī karnī hai

vahāñ va.ade hote haiñ aa.e din sar-e-shām ḳhvāb meñ ā.eñge
yahāñ iztirāb-e-tamām se mirī shab kī niiñd harām hai

dastakeñ detā rahā raat jo galiyoñ meñ use
zehn āvāra kahūñ niiñd kā maarā samjhūñ

niiñd ke ḳhvābī papoToñ ke tale
phāñs sī chubhtī huī purvā.ī hai

dil meñ dar aa.iiñ ga.ī sā.ateñ ḳhushbū ban kar
sadiyoñ kī niiñd se phir jāgte lamhe dekhe

na din pahāḌ lage ab na raat bhārī lage
na aa.e niiñd to ā.ankhoñ ko kyā ḳhumārī lage

thī niiñd merī magar us meñ ḳhvāb us kā thā
badan mirā thā badan meñ azaab us kā thā

da.ave baḌe haiñ tum ko javānī kī niiñd par
achchhā to aaj raat ko naalā kareñge ham

nizām-e-bazm-e-gulistāñ badal gayā shāyad
chaman kī god meñ ḳhāroñ ko niiñd aatī hai

janāza ashkoñ kā palkoñ ke dosh par hai abhī
isī liye to nazāroñ ko niiñd aatī hai

abhī chaman kā muqaddar chamak nahīñ saktā
abhī chaman kī bahāroñ ko niiñd aatī hai

zamīñ ke chāñd-sitāroñ ko niiñd aatī hai
hayāt-baḳhsh bahāroñ ko niiñd aatī hai

na Duub jaa.e kahīñ nabz-e-zindagī 'maikash'
sahar kā vaqt hai tāroñ ko niiñd aatī hai

ab inqilāb-e-zamāna kī fikr kaun kare
tirī nigāh ke māroñ ko niiñd aatī hai

unheñ kab niiñd aa.ī sunte sunte dil kā afsāna
yahī thā vaqt jab un ko bhī lutf-e-dāstāñ miltā

maiñ ne dhaḌkan sunī shajar kī raat
niiñd pattoñ ne be-ḳhatar kī raat

aur niiñd mīloñ duur
kisī nā-mālūm daraḳht ke pattoñ meñ chhupī

niiñd ke ta.āqub meñ
duur duur tak lā-hāsil

haa.il thī biich meñ jo razā.ī tamām shab
is ġham se ham ko niiñd na aa.ī tamām shab