Tags-Neend

niiñd āñkhoñ se shauq se jaa.e
rañj furqat meñ bekalī kā hai

jab hasrat-o-armāñ miT jaa.eñ kuchh aas na ho kuchh yaas na ho
jab maut kī niiñd aa.e dil ko bedār mohabbat hotī hai

raat ne niiñd pahnī magar
ḳhvāb kī be-libāsī rahī

dil dhaḌaktā hai to pahroñ nahīñ sone detā
niiñd aatī hai to ehsās jagā detā hai

maiñ niiñd meñ chaltā huā kho jā.ūñ na 'qaisar'
aahaT mire qadmoñ kī shab-e-tār meñ dekho

niiñd aa.ī nahīñ ka.ī din se
ḳhvāb hone lage garāñ jānāñ

niiñd mastoñ ko kahāñ aur kidhar kā takiya
ḳhisht-e-ḳhum-ḳhāna hai yaañ apne to sar kā takiya

kuchh din se to niiñd bhī rūThī rūThī hai
shab bhar us ko roz manāyā kartā huuñ

niiñd TuuTī hai mire ḳhvāb kahāñ TuuTe haiñ
aks terā hī haqīqat se gumāñ tak dekhūñ

sar uThāo to sahī aañkh milāo to sahī
nashsha-e-mai bhī nahīñ niiñd ke maate bhī nahīñ

nīñd-bharī āñkheñ bhī dhoka detī haiñ
jāgoge to ḳhvāb kahāñ se ā.eñge

aur phir niiñd hī aa.ī na koī ḳhvāb aayā
maiñ ne chāhī thī mire ḳhvāb meñ aa.ī huī raat

ḳhvāboñ kā sailāb nahīñ dekhā jaatā
nīñd-nagar ġharqāb nahīñ dekhā jaatā

maiñ har ek shab yahī band āñkhoñ se pūchhtā huuñ sahar talak
ki ye niind kis liye uḌ ga.ī agar ek ḳhvāb nahīñ rahā

ab aao mil ke so raheñ takrār ho chukī
āñkhoñ meñ niiñd bhī hai bahut raat kam bhī hai

jab zabāñ kholī to sab ko niiñd sī aane lagī
chup hue to yuuñ lagā har shaḳhs bahrā ho gayā

niiñd us kī hai dimāġh us kā hai rāteñ us kī haiñ
terī zulfeñ jis ke baazū par pareshāñ ho ga.iiñ

niiñd aa.e bhī to tasbīh-e-badan karte hue
aur phir saath uTheñ sub.h kā taarā dekheñ

us mah baġhair niiñd na aa.ī tamām raat
leTe hue ginā kiye taare palañg par

kartā huuñ niind meñ hī safar saare shahr kā
fāriġh to baiThtā nahīñ sone ke bāvajūd