Tags-Neend

niiñd se bojhal palkoñ par andesha-e-miTTī
kashtī-e-jāñ ke Dūbne kā lamha aayā hai

palkeñ bojhal haiñ madhur niiñd ke maare lekin
jaane kyā baat hai bedār haiñ terī āñkheñ

ruḳh-o-zulf kā huuñ fasāna-ḳhvāñ yahī mashġhala yahī kaam hai
mujhe din kā chain azāb-e-jāñ mujhe shab kī niiñd harām hai

mirī āñkhoñ meñ kis kī shoḳhī-e-lab kā tasavvur hai
ki jis ke kaif se āñkhoñ meñ merī niiñd aatī hai

niiñd bīmār-e-mohabbat ko kahīñ aatī hai
sub.h tā-shām agar bād-e-subuk-gām chale

niiñd ko log maut kahte haiñ
ḳhvāb kā naam zindagī bhī hai

kitnā āsān thā bachpan meñ sulānā ham ko
niiñd aa jaatī thī pariyoñ kī kahānī sun kar

kyā yahī ḳhvāb kī ta.abīr huā kartī hai
uḌ ga.ī niiñd bhī āñkhoñ kī kahānī sun kar

ajiib tajraba āñkhoñ ko hone vaalā thā
baġhair niiñd maiñ kal raat sone vaalā thā

qabr meñ aa ke niiñd aa.ī hai
na uThā.e ḳhudā kare koī

hukm na do bedārī kā
niiñd hī kis ko aatī hai

raat bhar niiñd nahīñ aatī mujhe
maiñ ne insān marā dekhā hai

tū garm raat meñ ThanDī havā kā jhoñkā thā
zarā qarīb se guzrā to niiñd sī aa.ī

ḳhvāb-e-uryāñ to isī tarah tar-o-tāza hai
haañ mirī niiñd kā malbūs purānā hī sahī

niiñd rātoñ ko ab nahīñ aatī
ḳhvāb aisā ḳharāb dekhā hai

kyā niiñd thī vo apne na hone ke nashe kī
kyuuñ ye mire hone ne batāyā hai ki maiñ huuñ

ai mire shor-e-nafas bār-e-samā.at se gurez
niiñd ke vaqt sadāoñ kā ubharnā kaisā

qissa mirā sunoge to jaatī rahegī niiñd
ārām chashm mat rakho is dāstāñ se tum

TūTtī rahtī hai kachche dhāge sī niiñd
āñkhoñ ko ThanDak ḳhvāboñ ko girānī de

dene lagtā hai koī zehn ke dar par dastak
niind meñ bhī to maiñ tanhā nahīñ hone paatā