Tags-Neend

kalī ḳhumār ke aalam meñ kasmasātī hai
khulī hai aañkh magar niiñd kā asar hai bahut

mohabbat meñ vafā vāloñ ko kab iizā satātī hai
ye vo haiñ jin ko suulī par bhī chaḌh kar niiñd aatī hai

tāroñ kā go shumār meñ aanā muhāl hai
lekin kisī ko niiñd na aa.e to kyā kare

usī ne ruup badal kar jagā diyā āḳhir
jo zahr mujh pe kabhī niiñd ban ke chhāyā thā

fikr hai aa.ī to hai niiñd kī gomātī hai
chūḌiyāñ bajtī haiñ chhāgal kī sadā aatī hai

baġhair us ke mujhe niiñd kaise aa.egī
duā.eñ dete ho tum kyuuñ mujhe sulāne kī

niiñd uchaT jaane se sab par jhuñjhlāhaT sī taarī hai
āñkheñ mīche bāñdh rahe haiñ ḳhvāboñ ke shīrāze log

jāgte haiñ sabhī shajar 'āzar'
dasht meñ kis ko niiñd aatī hai

jab subūhī le ke vird-e-marhabā kartā huuñ maiñ
zindagī ko niiñd se chauñkā diyā kartā huuñ maiñ

ham jaisoñ kī niiñd thakāvaT hotī hai
ham jaisoñ ke ḳhvāb nahīñ hote bhaa.ī

dekh kar un ke lab pe ḳhanda-e-nūr
niiñd sī ġham ko aa.ī jaatī hai

sar hī ab phoḌiye nadāmat meñ
niiñd aane lagī hai furqat meñ

āñkhoñ ko sab kī niiñd bhī dī ḳhvāb bhī diye
ham ko shumār kartī rahī dushmanoñ meñ raat

kiye va.ade bhī tum ne aur dī mujh ko tasallī bhī
na tum aa.e shab-e-furqat na niiñd aa.ī to kyā hogā

ajal kī niiñd meñ bhī ḳhvāb-e-hastī gar nazar aayā
to phir bekār hai tañg aa ke is duniyā se mar jaanā

kyuuñ havā tez chalī niiñd se vo jaag paḌā
ḳhvāb TuuTā hai to ilzām mujhe hī degā

ro kar bhī thake jism ko niiñd aatī hai lekin
bachche ke liye maañ kī thapak aur hī kuchh hai

so jaate haiñ fōtpath pe aḳhbār bichhā kar
mazdūr kabhī niiñd kī golī nahīñ khāte

ai havā jab use niiñd aane lage
raat apne Thikāne par jaane lage

ik ḳhvāb ḳhazāna nīñdoñ kā vo ham sab ne barbād kiyā
ik niiñd ḳharāba ḳhvāboñ kā aur ham sab is meñ rahte haiñ