Tags-Neend

niiñd kī āñkh-mīcholī se mazā lete haiñ
pheñk dete haiñ kitāboñ ko uThā lete haiñ

ḳhudā vo vaqt na laa.e ki sogvār ho tū
sakūñ kī niiñd tujhe bhī harām ho jaa.e

sehr lagtā hai pasīne meñ nahāyā huā jism
ye ajab niiñd meñ Duubī huī bedārī hai

āñkh-bhar niiñd meñ kyā ḳhvāb sameTeñ ki abhī
chāñdnī-rāt nahīñ rāt-kī-rānī bhī nahīñ

jo bhī kuchh achchhā burā honā hai jaldī ho jaa.e
shahr jaage yā mirī niind hī gahrī ho jaa.e

gahrī niind se mujh ko jagā kar chhoḌ gayā
ḳhvāb mirī āñkhoñ meñ sone aayā thā

saath gar sone na doge tum ko bhī niiñd aa chukī
maiñ to aadī ho gayā huuñ nāla-e-shab-gīr kā

aisā na ho ki ḳhvāb bhī jhaḌ jaa.eñ niiñd se
mausam yahāñ ho sard pa itnā ḳhafā na ho

na din ko hai kuchh sukūñ mayassar na shab ko aatī hai niiñd ham ko
yahī mohabbat kī ibtidā hai to phir kise intihā kaheñ ham

tirī niiñd se baḌī aañkh meñ mujhe tābkār kare kiran
mujhe aisī dhaat kā qalb de jise ḳhauf-e-radd-o-badal nahīñ

thak ke duniyā se agar kījiye ḳhvāboñ kī talāsh
niiñd uḌā detī haiñ afsāne sunā kar yādeñ

maiñ so gayā to koī niiñd se uThā mujh meñ
phir apne haath meñ sab intizām us ne liyā

aaj chhū leñge koī arsh mire vahm-o-gumāñ
ḳhvāb ko niiñd kī āñkhoñ meñ machalne deñge

jaag jaag kar umr kaTī hai
niiñd ke dvāre jā ke dekho

thak ga.ī niiñd mire ḳhvāb ko Dhote Dhote
kyā ta.ajjub hai mirī aañkh agar khul jaa.e

use niiñd aa.e bhī to kaise aa.e
vo mere ḳhvāb kā aadī huā hai

ek vo haiñ ki unheñ aa.ī hai ārām kī niiñd
ek maiñ huuñ ki kabhī chain se soyā bhī nahīñ

raat ke bahr meñ ġhota-zan hai
niiñd ko DhūñD rahā hai koī

sub.h se sub.h talak jāgte hī umr kaTī
ek shab hī sahī bhar niiñd to soyā hotā

ham niiñd kī chādar meñ lipTe hue chalte haiñ
is bhes meñ ab ham se milnā ho to aa jaanā