Tags-Neend

raat ga.e jab so jaatā hai paanī gahrī niiñd
naġhmoñ kī lahreñ uThtī haiñ chalte chappū se

shadīd niiñd kā ġhalba thā kuchh pata na chalā
ki itnī raat ga.e kaun milne aayā thā

raat ko chhup kar nikal jaatī hai āñkhoñ se 'jalīl'
sair dekho niiñd bhī kam-baḳht sailānī huī

sub.h kī niiñd vaqt kī ḳhushbū
tum Thahar jaao to hamārī hai

niiñd āñkhoñ meñ samo luuñ to siyah raat kaTe
ye zamīñ oḌh ke so luuñ to siyah raat kaTe

hameñ rusvā kiyā is niiñd meñ chalne kī aadat ne
vagarna jāgte meñ ham kabhī aisā nahīñ karte

ham titliyoñ ke pañkh pe dhāreñ lagā ke niiñd kī
ik shahr-e-nau ke ḳhvāb meñ chhoḌā kareñge raat din

zamīr-e-ḳhāk meñ ḳhufta hai merā dil 'amjad'
ki niiñd mujh ko milī ḳhvāb-e-raftagāñ ke liye

kabhī vo din the ki niiñd āñkhoñ kī sarhadoñ se pare pare thī
magar maiñ ab jab bhī sonā chāhūñ tumhārī yādoñ ke ḳhvāb likkhūñ

ḳhvāb ta.abīroñ ke ma.anī pūchhte haiñ
niiñd be-anjām ho kar rah ga.ī hai

ab bhī aatī hai tirī yaad pa is karb ke saath
TūTtī niiñd meñ jaise koī sapnā dekhā

ai shab-e-ġham chhoḌ de dāman-sarā hai ab mujhe
niiñd se uThnā vo ḳhvābīda sharāra DhūñDhnā

ḳhvāb to ḳhvāb rahe niiñd bhī aane se rahī
gard-e-bedārī-e-shab muñh pe malī kyā na huā

niiñd us ke husn-e-ruḳh ke tasavvur meñ aa.ī thī
dekhā hai barq-e-tūr kā manzar tamām raat

kahtī hai dulhan shaam kī bāloñ ko bikhere
yuuñ niiñd bhī āñkhoñ se uḌaa.ī nahīñ jaatī

jaise vo thā hī nahīñ raat kī niiñd
jaise vo thā hī nahīñ merā ḳhvāb

kisī ko niiñd na aatī ho raushnī meñ agar
to ḳhud charāġh-e-mohabbat bujhānā paḌtā hai

yaqīñ jitnī bhī gahrī niiñd meñ ho
koī vasvās andar jāgtā hai

niiñd ke vāste vaise bhī zarūrī hai thakan
pyaas bhaḌkā.eñ kisī saa.e kā pīchhā kar aa.eñ

raat bhī niiñd bhī kahānī bhī
haa.e kyā chiiz hai javānī bhī