Tags-Neend

bārhā niiñd se yuuñ chauñk uThā huuñ jaise
mere bistar pe tirī yaad huī hai bedār

ab bhī aatī hai tirī yaad pa is karb ke saath
TūTtī niiñd meñ jaise koī sapnā dekhe

niiñd un kī uchāT ho ga.ī hai
āñkhoñ meñ sharāb ubal paḌī hai

andarūñ niiñd kā ik ḳhālī makāñ hotā thā
merī āñkhoñ meñ tirā ḳhvāb nihāñ hotā thā

ḳhushk khajūr ke pattoñ se jab niind kā bistar sajtā thā
ḳhvāb-nagar kī shahzādī galiyoñ meñ aan nikaltī thī

mujhe vo ḳhvāb phir se dekhnā thā
maiñ ḳhud pe niiñd taarī kar rahā thā

dil raqīboñ ke larazte the ye thā kaam terā
niiñd se chauñk paḌe sun jo liyā naam terā

ek hameñ hī ai sahar niiñd na aa.ī raat bhar
zānū-e-shab pe rakh ke sar saare charāġh so ga.e

merī in āñkhoñ meñ jugnū se chamakte haiñ ka.ī
ḳhvāb aate haiñ mirā niiñd meñ pīchhā karte

ye āñkheñ niiñd meñ bhī jāgtī haiñ
ye kis kā zikr dohrāyā gayā hai

pesha-var logoñ se kyā leñ zindagī par tabsira
niiñd aur ḳhvāboñ se un kā vāsta hotā nahīñ

niiñd kī kaa.ī se bojhal hai har ik aañkh magar
sañg ke ḳhauf se shīshe kā nagar jaage hai

niiñd kahāñ ab to rahtī hai ā.ankhoñ meñ zahrāb kī dhund
miTTī kā dil chiir ke saare ḳhvāboñ ko daab aa.e ham

kaise qisse the ki chhiḌ jaa.eñ to uḌ jaatī thī niiñd
kyā ḳhabar thī vo bhī harf-e-muḳhtasar ho jā.eñge

lāzmī hai ḳhirad kī bedārī
niiñd lekin kabhī kabhī mire dost

niiñd bharī in āñkhoñ meñ
ḳhvāb kahāñ se lā.ūñ maiñ

jab ye dil rifāqat kī kachchī niiñd se jaagā
har taraf sunā.ī dī iḳhtitām kī aahaT

shahr-e-shab meñ kaun sā ghar thā na dī jis par sadā
niiñd ke andhe musāfir ko milā kuchh bhī nahīñ

isī tarah se rakho band merī āñkheñ ab
ki niiñd ḳhvāb badalne ke baad aa.ī hai

fikr-e-ta.abīr meñ niiñd uḌ ga.ī dīvānoñ kī
ḳhvāb apne hī un āñkhoñ meñ jo bedār mile