Tags-Neend

nahīñ hai is niiñd ke nagar meñ abhī kisī ko dimāġh merā
magar kisī ḳhvāb ke safar meñ sipar kareñge charāġh merā

maiñ apnī niiñd agar TūTne nahīñ detā
us ek ḳhvāb se har vaqt TūTnā thā mujhe

ḳhvāb tumhāre aate haiñ
niiñd uḌā le jaate haiñ

hañsī aa.e tujhe yā niiñd lekin aah mujh ko to
bas ai be-gāna-e-dard ek hī afsāna aatā hai

abhī shu.ūr ne bas dukhtī rag TaTolī hai
abhī to zindagī bas niiñd hī meñ bolī hai

un ko aatī thī niiñd aur mujh ko
apnā qissa tamām karnā thā

sub.h ko jhoñke niiñd ke kaise
kahīñ jaagā huā hai tū shab kā

raat bhar niiñd se rahtī hai laḌā.ī merī
tū mire yaar agar mujh ko bhulā kar so.e

un se bichhḌe haiñ to phir niiñd na aa.ī 'rahbar'
taare gin gin ke har ik raat guzārī ham ne

dard-e-furqat meñ na so pāoge ab chain se tum
niiñd āñkhoñ se churā lī hai tumhārī ham ne

ab to aa.e nazar meñ jo bhī ho
niiñd ke bām-o-dar meñ jo bhī ho

shab-e-firāq meñ taare gine to niiñd aa.ī
ye haal ho gayā āḳhir tumhāre shaidā kā

behoshiyoñ ko niiñd se nisbat zarūr hai
kuchh ḳhaar bhī bichhā le ridā-e-hayāt par

niiñd aatī hai us ke saa.e meñ
gir jaa.e ye dīvār agar

kyā hī rah rah ke tabī.at mirī ghabrātī hai
maut aatī hai shab-e-hijr na niiñd aatī hai

ab kis ke intizār meñ jāgeñ tamām shab
vo saath ho to niiñd meñ kaise ḳhalal paḌe

gosh-zad hote hī huī dushman
niiñd terī mirī kahānī kī

hai niiñd se koī bhī ta.alluq nahīñ mirā
har dam ye chashm-e-vā meñ ubhartā hai ḳhvāb kyā

din ke pahle pahr meñ hī apnā bistar chhoḌ kar
raushnī niklī hai niiñd apnī falak par chhoḌ kar

jis ko paane meñ gañvā dī hai ka.ī saal kī niiñd
ab vahī bar-sar-e-paikār hai maiñ jāntā huuñ