Tags-Neend

soch rahā huuñ gaañv meñ jā kar kuchh din ab ārām karūñ
vahīñ kahīñ par rakh aayā huuñ niiñd purānī us ke paas

ḳhvāb kā intizār ḳhatm huā
aañkh ko niiñd se jagāte haiñ

jis ke liye havāoñ se muñh poñchhtī hai niiñd
is jur.at-e-hisāb meñ ḳhvāboñ kā Dar to hai

biis barsoñ se
maiñ sukh kī niiñd so paaya nahīñ

raat ko jo bhī ḳhvāb meñ dekhā sub.h vahī ta.abīr kiyā
agle roz bhī jāgnā hogā niiñd bichārī baiThegī

sab dauḌte the us kī ayādat ke vāste
jis ko zarā sā niiñd se bedār dekhte

mire sāz-e-nafas kī ḳhāmushī par ruuh kahtī hai
na aa.ī mujh ko niind aur so gayā afsāna-ḳhvāñ merā

apne apne ghar jā kar sukh kī niiñd so jaa.eñ
tū nahīñ ḳhasāre meñ maiñ nahīñ ḳhasāre meñ

ka.ī umr dauḌte-bhāgte rahe yuuñ to shab ko bhī jāgte
kabhī thak ga.e to Thahar ga.e kabhī niiñd aa.ī to so liye

sahrā jañgal meñ mat jā
niiñd mire bistar meñ rah

hijr kī shab gar yahī hai iztirāb
niiñd ai 'taslīm' kyūñkar aa.egī

kyā ḳhabar kab niiñd aa.e dīda-e-be-ḳhvāb meñ
shaam se ham jal rahe haiñ sāya-e-mahtāb meñ

ma.alūm nahīñ niiñd kise kahte haiñ lekin
kartā to huuñ ik kaam maiñ sone kī tarah kā

dene vaale tū mujhe niiñd na de ḳhvāb to de
mujh ko mahtāb se aage bhī kahīñ jaanā hai

lā rahe haiñ niiñd ke āġhosh meñ
ashk mujh ko thapkiyāñ dete hue

ek añgḌā.ī se saare shahr ko niiñd aa ga.ī
ye tamāshā maiñ ne dekhā baam par hotā huā

agarche ishq meñ ik be-ḳhudī sī rahtī hai
magar vo niind bhī jaagī huī sī rahtī hai

mirī band aañkh pe vā hue ka.ī dar tilism-e-ḳhayāl ke
mujhe niiñd aa.e to kis tarah mujhe ḳhvāb-e-ahd-fazā milā

phir dast-e-sabā ne vo gajar aaj bajāyā
palkoñ pe phir ik baar mirī niiñd uḌī hai

tanhā.ī kā sannāTā aur aatī jaatī rāteñ
terī yaad na aur koī ġham phir bhī niiñd na aa.e