Tags-Nigaah

dil bhī bachā jigar bhī bachā ḳhair ho ga.ī
tīr-e-nigāh paar huā darmiyān se

nigāh-e-tā.ir-e-zindāñ uThī thī ghar kī taraf
ki soz-e-ātash-e-giryāñ se daaġh jalne lage

misl-e-nigāh ghar se na bāhar rakhā qadam
phir aa.e har taraf ye jahāñ ke tahāñ rahe

ab junūñ kī sarhadoñ se aa milā hai josh-e-ishq
kuchh samajh kar ab nigāh-e-husn barham kījiye

husn kī jānib nigāh-e-shauq yā kam kījiye
yā nigāh-e-shauq ko ik ahd-e-mohkam kījiye

vo tā.ir-e-nigāh bhī safar meñ saath hai mire
ki jis kā zikr tak abhī kisī uḌaan meñ nahīñ

kise DhūñDte ho nagar nagar kise shahr shahr ho pūchhte
tumheñ shams' jis kī talāsh hai vo nigāh-e-ā.ina gir ga.ī

bahut dinoñ meñ taġhāful ne tere paidā kī
vo ik nigah ki ba-zāhir nigāh se kam hai

tirī nigāh meñ hai sirf ḳhatra-e-girdāb
ye dekh saikḌoñ tūfān meñ safīne meñ

nigāh tuur pe hai aur jamāl siine meñ
ye kaifiyat hai tirā naam le ke piine meñ

hālat pe merī un ke bhī aañsū nikal paḌe
dekhā gayā na yaas meñ aalam nigāh kā

go jannat-e-nigāh hoñ firdaus-e-rañg hoñ
guzrī huī hasīn bahāroñ ko kyā karūñ

liyā jab naam ulfat kā badal jaatī hai sīrat bhī
nigāh-e-sharm-āgīñ meñ sharārat aa hī jaatī hai

nigāh-e-ishq o chashm-e-husn do sāvan ke bādal hai
ye jab milte haiñ dil par ek bijlī sī barastī hai

mirī nigāh ke dāman ko khīñch letī haiñ
tire ḳhayāl kī gul-posh vādiyāñ kyā kyā

jumbish abrū ko hai lekin nahīñ āshiq pe nigāh
tum kamāñ kyuuñ liye phirte ho agar tiir nahīñ

maiñ us galī meñ gayā aur dil o nigāh samet
'jamāl' jeb meñ jo kuchh thā jhaaḌ aayā huuñ

jhulas ga.e nigāh ke tamām ḳhvāb aañch se
ye dāstān hai nazar pe raushnī ke vaar kī

taḌap dikhā na ise 'bahr' māhī-e-dil kī
ġhazab huā jo vo tār-e-nigāh shast hue

nigāh duur talak jā ke lauT aa.egī
karoge yaad to har baat yaad aa.egī