Tags-Nigaah

aa.e the chashm-e-shauq kī hasrat nikālne
sar-tā-qadam nigāh banā kar chale ga.e

lagā rahe haiñ vo nashtar se zaḳhm par marham
nigāh-e-lutf-e-karam meñ bhī hai itaab kā rañg

kahāñ se palTe kahāñ pe Thahre
ye munhasir ab nigāh par hai

ravāñ-davāñ na.ī tahzīb kā safar rakkho
magar nigāh ko manzil se bā-ḳhabar rakkho

batā tū dil ke bachāne kī koī raah bhī hai
tirī nigāh kī nāvak-fagan panāh bhī hai

nigāh-e-dil se jis din usva-e-shabbīr dekheñge
ḳhalīlullāh apne ḳhvāb kī ta.abīr dekheñge

us ne nigāh-e-lutf-e-karam baar baar kī
ab ḳhairiyat nahīñ hai dil-e-be-qarār kī

dekhā bahut nigāh-e-talab ko milā nahīñ
tum se tum hī ho tum sā koī dūsrā nahīñ

kam-mā.egī na pūchh mirī bazm-e-ġhair meñ
uThtī hai har nigāh ḳharīdār kī tarah

aur ek baar qalb ko taḌpā.e vo nigāh
itnī sakat abhī to hamāre jigar meñ hai

kyā pūchhte ho jauhar-e-teġh-e-nigāh-e-nāz
ye us se tez hai jo tumhārī kamar meñ hai

jaañ se guzar ke bhī kabhī shāyad na ye khule
jaadū ye kis nigāh kā merī nigah meñ thā

ḳhaak tere qadam-e-pāk kī ai nūr-e-nigāh
surma-e-dīda-e-jāñ thā mujhe ma.alūm na thā

dard be-davā apnā baḳht nā-rasā apnā
ai nigāh-e-be-parvā tujh se ham ko shikva kyā

nahīñ hai siine meñ paivast jis ke tīr-e-nigāh
vo rāh-o-rasm hayāt-o-mamāt kyā jaane

nigāh jin ko milī hai vo lutf lete haiñ
chhalak rahe haiñ paḌe kaifiyat se vīrāne

sitam to shāyad maiñ bhuul jaatā agar ye nashtar chubhā na hotā
vo ik nigāh-e-karam jo kī thī nigāh-e-nā-mehrbāñ se pahle

ik umr ba.ad isī mutalavvin nigāh meñ
kitnī mohabbatoñ kā ḳhazāna nihāñ milā

sad shukr hai ki mujh pe nigāh-e-karam paḌī
kab se udaas baiThā maiñ fariyādiyoñ meñ thā

ik nigāh-e-lutf vo pahlī sī dildārī ke saath
daan kar diije ġharīboñ kā bhalā ho jā.egā