Tags-Nigaah

nigāh-e-lutf meñ ġham kā mire shumār nahīñ
ye e'tibār ba-andāz-e-e'tibār nahīñ

terī kamand-e-zulf ke mulk-ba-mulk haiñ asiir
bismil-e-ḳhanjar-nigāh ḳhāna-ba-ḳhāna kū-ba-kū

kaif-e-ḳhud-āgahī bhī hai ālam-e-be-ḳhudī bhī hai
shauq-e-supurdagī bhī hai aaj nigāh-e-nāz meñ

hamīñ vafāoñ se rahte the be-yaqīn bahut
dil-o-nigāh meñ aa.e the mah-jabīn bahut

jumbish abrū ko hai lekin nahīñ āshiq pe nigāh
tum kamāñ kyuuñ liye phirte ho agar tiir nahīñ

nigāh nīchī huī hai merī
ye TūTne kī ghaḌī hai merī

faqat ik sādgī par shoḳhiyoñ ke haiñ gumāñ kyā kyā
nigāh-e-sharmagīñ se hai nihāñ kyā kyā ayaañ kyā kyā

ye aur baat hai mahfūz bijliyoñ se na the
mirī nigāh meñ the yuuñ to āshiyāñ bhī bahut

jis par nigāh-e-lutf-e-karam aap kī rahī
hairat se har nigāh use dekhtī rahī

tere jamāl kī doshīzgī kī qaus-e-quzah
nigāh mahbat-e-idrāk meñ na kyuuñ rakh luuñ

taḌap dikhā na use 'bahr' māhī-e-dil kī
ġhazab huā jo vo tār-e-nigāh shast hue

chashm-e-ḳhūñ-rez tirī kī hai ajab tund-nigāh
hū-ba-hū ain kaTārī hai ḳhudā ḳhair kare

nazzāra jin kā bā.is-e-rahm-e-nigāh thā
āñkhoñ ke sāmne vahī manzar palaT kar aa.e

kisī maqām pe vo bhī bichhaḌ ga.ī mujh se
nigāh-e-shauq jo detī thī hausla mujh ko

dekhā hai kis nigāh se tū ne sitam-zarīf
mahsūs ho rahā hai maiñ ġharq-e-sharāb huuñ

agar hai terī nigāh bāliġh agar hai terā shu.ūr puḳhta
to jehl kī zulmatoñ hī se tujh ko mash.al-e-āgahī malegī

nigāh jitnī bulandī hogī ye utnī hī arjumand hogī
ba-qadr-e-qurb-e-falak kiran meñ harārat-o-raushnī milegī

ham apne shauq diyoñ kī salāmtī chāheñ
kisī ke anjum-o-mahtāb par nigāh nahīñ

ye sun ke sharm se koī javāb ban na paḌā
jhukī nigāh-e-jabīñ ho ga.ī araq-ālūd

jūñhī nigāh meñ tirā chehra utar gayā
dāman udaas raat kā tāroñ se bhar gayā