Tags-Nigaah

qarz-e-nigāh-e-yār adā kar chuke haiñ ham
sab kuchh nisār-e-rāh-e-vafā kar chuke haiñ ham

tirī nigāh-e-karam hai vagarna ai ġham-e-dost
zamāna kyā tire shaidā.iyoñ se ḳhālī hai

nigāh-e-qahr-parvar ko bhī tamhīd-e-ḳhushī samjhe
samajhnā hai to koī ham se rāz-e-zindagī samjhe

tirī nigāh kī jumbish meñ ab bhī shāmil haiñ
mirī hayāt ke kuchh muḳhtasar se afsāne

kabhī to ham pe uThe chashm-e-āshnā kī tarah
vo ik nigāh ki sad-gardish-e-zamānā hai

jab se Dhālā hai sitāroñ meñ nigāh-e-shauq ko
chāñd se baḌh kar tumhārā bāñkpan lagne lagā

hove agarche apnī sharāfat upar nigāh
hargiz badī ke kaam pe dil dījiye bhī nahiñ

nafas nafas meñ rahe kyoñ na ik jahān-e-sifāt
mirī nigāh meñ tanvīr-e-husn-e-zāt bhī hai

sitam hī karnā jafā hī karnā nigāh-e-ulfat kabhī na karnā
tumheñ qasam hai hamāre sar kī hamāre haq meñ kamī na karnā

kitāb-e-sahrā meñ zikr aa.e jab samundar kā
mirī hayāt kisī kī nigāh likh liije

halāvatoñ meñ vo Duubī sī ik karam kī nigāh
latāfatoñ meñ vo lipTe hue hazār sitam

dikhā ga.ī mujhe nairañgiyāñ zamāne kī
vo ik nigāh kabhī multafit kabhī barham

vo ek raat thī aisī ki qadr-o-asrā ne
nigāh apnī jamā.ī to phir haTā.ī nahīñ

kaam hazāroñ karne haiñ
kyā kyā rakkheñ pesh-e-nigāh

nigāh-e-nāz kā ik vaar kar ke chhoḌ diyā
dil-e-harīf ko bedār kar ke chhoḌ diyā

ilāhī de nigāh-e-lutf ḳhush-chashmoñ ko ik pal bhī
ki ham bīmār mar ga.e naaz uThāte in tabīboñ ke

ye chamak-damak to fareb hai mujhe dekh gahrī nigāh se
hai libās merā sajā huā mirā dil magar hai bujhā huā

sūraj ke paar dekh sako gar mirī tarah
tab jā ke pāoge mirī hadd-e-nigāh ko

us ne jalāyā mere nasheman ko phir kahā
hadd-e-nigāh tak tujhe sahrā dikhā.ī de

jis shahr-e-ārzū ke nishānāt miT ga.e
dil kī nigāh phir vahīñ jaatī hai aaj bhī