Tags-Nigaah

nigāh-e-mehr kahāñ kī vo barhamī bhī ga.ī
maiñ dostī ko jo royā to dushmanī bhī ga.ī

shauq-e-dīdār yak-nigāh durust
tāb-e-nazzāra-e-jamāl kahāñ

tirī nigāh thī to ik jahān sāzgār thā
tirī nigāh phir ga.ī to ik jahāñ badal gayā

nigāh-e-ġhair jise mo'tabar bahut Thahrī
use maiñ kaise dikhātā nagar akelā thā

hai ye bhī ek fusūn-e-nigāh ai 'rizvān'
nahīñ vo paas magar rū-ba-rū lage hai mujhe

hadaf banā.egā dil ko mire jigar ko bhī
tirī nigāh kā paikāñ nahīñ ḳhatā ke liye

kisī ke ruḳh pe nazar jam ke rah ga.ī shāyad
mirī nigāh meñ rañgīnī-e-bahār nahīñ

tavīl umr se fikr-o-nazar kī qaid meñ huuñ
nigāh-e-vaqt kī suulī se ab utaar mujhe

ajab gumān the qaus-e-nigāh meñ us kī
khañDar se shahr ko is ne khañDar nahīñ likkhā

ḳhūnīñ diloñ ke qatl kuuñ sīdhī nigāh bas
is teġh kuuñ fasān-e-taġhāful siiñ kyā ġharaz

bas ik nigāh-e-mohabbat se un ko dekhā thā
haiñ mujh se kis liye vo bad-gumāñ nahīñ ma.alūm

nigāh-e-ulfat bhī ho chalī kuchh sitam bhī karne lagā vo zālim
agar yahī mehrbāniyāñ haiñ to kāmrānī hai aur ham haiñ

kuchh tumhārī nigāh kāfir thī
kuchh mujhe bhī ḳharāb honā thā

tāb-o-tavān-o-dīn-o-dil-o-aql-o-sabr-o-hosh
vo shoḳh mujh se le gayā sab ik nigāh se

mirī taraf tirī uThtī nigāh thoḌī hai
tire gurez meñ ab ishtibāh thoḌī hai

ik fusūñ-sāmāñ nigāh-e-āshnā kī der thī
is bharī duniyā meñ ham tanhā nazar aane lage

milne ke ba.ad baiTh rahā pher kar nigāh
zālim yagāna hote hī begāna ho gayā

dam-e-hashr azal kī bhī yaad kar ye zabān kyā ye nigāh kyā
jo kisī se aaj na ho sakā vo savāl bār-e-digar bhī hai

na ġham-e-azāb-o-savāb se kabhī chheḌ fitrat-e-ishq ko
jo azal se mast-nigāh hai use nek-o-bad kī ḳhabar bhī hai

jo bas ek pahlī nigāh meñ mire dil kā raaz samajh sake
mujhe ibtidā-e-hayāt se isī dīda-var kī talāsh hai