Tags-Pani

miTTī yahāñ kī Thiik hai miTTī se kuchh gilā nahīñ
āñkheñ milā milā ke bas paanī badal rahā huuñ maiñ

bahtī rahī nadī mire ghar ke qarīb se
paanī ko dekhne ke liye maiñ taras gayā

mauja-e-ġham ne to dam toḌ diyā
rah gayā aañkh meñ paanī phir bhī

aag lagā.ī jā saktī hai paanī meñ
ik koshish lā-sānī karnī paḌtī hai

kisī ne aaj hī paanī meñ paañv Daalā hai
chalā hai aaj hī dariyā nishān se uupar

sāqī-garī kā farz adā kar diyā gayā
paanī kā ghūñT zahr milā kar diyā gayā

aañkh kī tah meñ koī sahrā na ho
aa rahī hai ret bhī paanī ke saath

rakkhūñgā kabhī dhuup kī choTī pe rihā.ish
paanī kī tarah abr ke TukḌe meñ rahūñgā

khā ke sūkhī roTiyāñ paanī ke saath
jī rahā thā kitnī āsānī ke saath

mai-kade meñ mire saaqī kā nayā hukm ye hai
shaam ko pyaas lage sub.h ko paanī māñge

zulf-e-shab-gūñ tire shāne pe khulī nāgin hai
Das le ye jis ko na phir uTh ke vo paanī māñge

sabz-o-shādāb sāhil
ret ke aur paanī ke giit

dil pe mushkil hai bahut dil kī kahānī likhnā
jaise bahte hue paanī pe ho paanī likhnā

ki jaise taptā tavā aur buuñd paanī kī
zamīñ pe ham bhī usī tarah chhan se aate haiñ

na samjhe ashk-fishānī ko koī māyūsī
hai dil meñ aag agar aañkh meñ bhī paanī hai

kisī chashme ke paanī par
kisī manzar kī shabnam meñ

miTTī kī izzat hotī hai
paanī kā charchā hotā hai

aks paanī meñ jal ga.e kitne
jugnuoñ se bahal ga.e kitne

mirā dil bhī koī panghaT hai jahāñ pariyāñ paanī bhartī haiñ
koī piiḌā nahīñ koī shor nahīñ sab paanī mirā gahrā ke suno

kahīñ pe kaa.ī kahīñ habs aur kahīñ daldal
ye haal shahr kā paanī utarne par hogā