Tags-Pani

kun-fayakūñ kā hāsil ya.anī miTTī aag havā aur paanī
pal meñ baqā kā pal meñ faanī miTTī aag havā aur paanī

maiñ ā.īna dekh rahā huuñ lekin ye kyā dekh rahā hai
merā aks pas-e-hairānī miTTī aag havā aur paanī

maiñ kabhī sho.ala huuñ kabhī shabnam gaahe zaḳhm to gaahe marham
karte haiñ mujh meñ khīñchā-tānī miTTī aag havā aur paanī

merā kyā hai mar jā.ūñgā chāroñ or bikhar jā.ūñgā
aap kahāñ jā.eñge jaanī miTTī aag havā aur paanī

ḳhāk-basar huuñ shola-ba-jāñ huuñ āh-kunāñ huuñ ashk-fishāñ huuñ
dekh tū apnī kāristānī miTTī aag havā aur paanī

nagrī nagrī phirtī haiñ ye dīvāreñ bhī saath hī mere
karte haiñ merī nigrānī miTTī aag havā aur paanī

ishq kī nisbat se haiñ zinda sahrā sūraj bādal dariyā
ishq nahīñ to sab be-ma.anī miTTī aag havā aur paanī

ajab junūn hai ye intiqām kā jazba
shikast khā ke vo paanī meñ zahr Daal aayā

itne aañsū to na the dīda-e-tar ke aage
ab to paanī hī bharā rahtā hai ghar ke aage

paanī kī taqsīm ke pīchhe jalte khet sulagte ghar
aur khetoñ kī zard muñDeroñ par kumlātī do-pahreñ

dil meñ aap aa.e to nikle kitne log
chiyūñTiyoñ ke bil meñ paanī paḌ gayā

mujh ko Thahre hue sāhil se nahīñ thī ummīd
mujh ko bahte hue paanī ne sambhālā hogā

thoḌī sī miTTī kī aur do buuñd paanī kī kitāb
ho agar bas meñ to likheñ zindagānī kī kitāb

harā samundar gopī chandr
bol merī machhlī kitnā paanī

jīvan ko dukh dukh ko aag aur aag ko paanī kahte
bachche lekin so.e hue the kis se kahānī kahte

vaqt ke shor meñ yuuñ chīḳh rahe haiñ lamhe
bahte paanī meñ koī Duub rahā ho jaise

kabhū tū ro to us ko ḳhaak uupar jā ke ai lailā
ki bin paanī jañgal meñ ruuh majnūñ kī bhaTaktī hai

chalo is marhale par hī koī tadbīr kar dekho
vagarna shahr meñ paanī to dāḳhil hone vaalā hai

mahv-e-hairat the ki be-mausam nadī pāyāb thī
bas khaḌe dekhā kiye utre nahīñ paanī meñ ham

pheñkte sañg-e-sadā dariyā-e-vīrānī meñ ham
phir ubharte dā.era-dar-dā.era paanī meñ ham