Tags-Pani

us ke ehsān se inkār nahīñ hai lekin
naqsh paanī pe 'zafar' kaise banāyā jaa.e

kal jo sailāb aa gayā tū 'azīm'
ham ne jaanā mizāj paanī kā

ġhuzashtagānī hai zindagānī na ye havā hai na hai ye paanī faqat ravānī
jo vāqi.ātī hai vo hai qissa jo vāqa.ī hai vo shā.irī

paanī bharne ek kueñ par jaatī thī
us kā paanī mīThā hotā jaatā thā

shikāyat aur to kuchh bhī nahīñ in āñkhoñ se
zarā sī baat pe paanī bahut barastā hai

pī kar bhī tabī.at meñ talḳhī hai girānī hai
is daur ke shīshoñ meñ sahbā hai ki paanī hai

ilāhī vasf ho dil meñ to mere itnā ho
bharūñ jo chullū meñ paanī sharāb ho jaa.e

huī jaatī hai paanī sharm se sham.a
magar vo maah aayā anjuman meñ

aag paanī meñ farozāñ dekho
tum bhī us ghar kā charāġhāñ dekho

samundar adā-fahm thā ruk gayā
ki ham paañv paanī pe dharne ko the

paanī kī talab laa.ī kahāñ se ye kahāñ pe
sahrā sā to lagtā hai ye sāgar nahīñ lagtā

ham pī bhī ga.e aur salāmat bhī haiñ 'amabar'
paanī kī har ik buuñd meñ hiire kī kanī thī

maiñ ki ḳhush hotā thā dariyā kī ravānī dekh kar
kaañp uTThā huuñ galī-kūchoñ meñ paanī dekh kar

sūkhī Tahnī bhī harī honī thī ik roz 'ḳhalīl'
tū agar roz use ashkoñ kā paanī detā

yahī bahut hai ki paanī ko chhū liyā ham ne
baḌā hai bahr-e-mohabbat shanāvarī kam hai

phir paanī meñ Daal madhānī baiTh ga.e haiñ dost
phir merī roTī par chupḌeñge ye phīke jhaag

ġhazab kā aa.egā sailāb yaaro
ki guzrā hai bahut sā paanī sar se

pāgal sā huā jaatā hai ḳhāmosh samundar
paanī pe baras jaate haiñ jab chāñd ke haale

kyā baat karūñ kabhī paanī bāteñ kartā thā
ye dariyā is kī ḳhushk zamīñ kyā baat karūñ

ham jhulaste kamroñ meñ
paanī ke ḳhvāb dekhne ke liye