Tags-Pani

apne aks se sharminda haiñ
paanī ham ko kar gayā paanī

us kī pyaas kī ḳhātir maiñ ne
pahroñ ok meñ rakkhā paanī

is nagrī meñ daam na pūchho
sastā ḳhuun hai mahñgā paanī

gor meñ qulzum kī jā soyā
koh kī god kā khelā paanī

pāyābī se haar na maano
mil jā.egā gahrā paanī

merī ḳhvāhish bahtā paanī
merī qismat Thahrā paanī

kachchī chhat par TuuT ke barsā
behis bahrā andhā paanī

isī ko pī ke hotī hai shifā bīmar-e-ulfat ko
davā qātil tire talvār ke paanī ko kahte haiñ

farañgī shīshagar ke fan se patthar ho ga.e paanī
mirī iksīr ne shīshe ko baḳhshī saḳhtī-e-ḳhārā

phuul joḌe meñ sajāne ke liye hote haiñ
phuul paanī meñ bahāne kī zarūrat kyā hai

ho gayā shāmil ġharaz kā rañg mauj-e-ishq meñ
jhiil ke nithre hue paanī meñ gaarā mil gayā

ghul ga.ī betābī-e-dil vaqt ke mahlūl meñ
zabt ke Thahre hue paanī meñ paara mil gayā

toḌ degā sab hadoñ ko ek din
bahte paanī ko jo rokā jā.egā

kyā girānī aur arzānī kī ham bāteñ kareñ
paanī mahñgā hai yahāñ aur ḳhuun saste daam hai

paanī le aa.e haiñ ab ek na.ī uljhan hai
kūza-gar tere liye ḳhaak kahāñ se laa.eñ

kaise merā lahū
paanī ho ke masāmoñ se bahtā rahā

maiñ apne ham-rāh ek duniyā ko le ke jab chal paḌūñgā 'sājid'
zamīn paanī ke narm dhāre pe kyā yūñhī ghūmtī rahegī

āñkhoñ kī aabjū ke kināre kisī kā aks
paanī meñ lag rahā hai parinda banā huā

paanī ne jise dhuup kī miTTī se banāyā
vo dā.era-e-rabt bigaḌne ke liye thā

in ashkoñ ko paanī kahnā bhuul nahīñ nādānī hai
tan-man meñ jo aag lagā de ye to aisā paanī hai