Tags-Pani

jaise paanī pe naqsh ho koī
raunaqeñ sab adam-sabāt rahīñ

abhī to miTTī mahak uThī hai namī ko pā kar
abhī vo paanī kī chaal se āshnā nahīñ hai

'fayyāz' tū nayā hai na pī baat maan le
kaḌvī bahut sharāb hai paanī milā ke pī

ġham to ho had se sivā aur ashk-afshānī na ho
us se pūchho jis kā ghar jaltā ho aur paanī na ho

le chashm-e-nam-rasīdd paanī chuvāne koī
vaqt-e-aḳhīr us ke bīmār tak na pahuñchā

kis tarah kījiye fikr-e-sharar-afshāni-e-ashk
jab ki paanī meñ lagī aag bujhānāñ mushkil

tirī mohabbat kī vādiyoñ meñ mirī javānī se duur kyā hai
jo saada paanī ko ik nashīlī nazar meñ rañgīñ sharāb kar de

haif āñkhoñ ne bhī dekhī na mirī tishna-labī
muñh meñ paanī mizha-e-tursī chuvāyā na gayā

Thahre paanī meñ kuchh nahīñ hotā
shor āb-e-ravāñ se uThtā hai

maiñ is kuuze ke paanī se koī shamshīr Dhālūñgā
aur us ko ā.īne se aab dūñgā sabr miTTī se

phuuT kar rone se ashkoñ kā marā hai paanī
be-bahār aa.e khulī jaatī hai turbat merī

ham ne sahrā ko chhān maarā hai
pyaas paanī meñ so rahī hogī

bargashta-tāla.ī kā tamāshā dikhā.ūñ maiñ
ghar ko lage jo aag to paanī bujhā.ūñ maiñ

ḳhvāb hamārī galiyoñ ke gande paanī par
machchhar-mār davā.eñ haiñ

zā.iqa zaḳhmoñ kā yuuñ kaise samajh meñ aa.egā
pheñknā hai band paanī meñ koī patthar to aa

sālahā ishq-e-zanaḳhdāñ ne lahū paanī kiyā
muddatoñ ro.e haiñ jā jā kar kināre chaah ke

raat ik niile ḳhvāb meñ maiñ ne
paanī kī āmezish se

maiñ zindagī se na khul sakā is liye bhī 'mohsin'
ki bahte paanī pe kab talak e'tibār karnā

vo hai aag vo paanī hai
sab kī ek kahānī hai

dekh ke sar par gahrā bādal ḳhushk nigāheñ kahtī haiñ
aaj hameñ ye abr yaqīnan paanī de kar jā.egā