Tags-Parwana

sham.a o parvāna siiñ sunā hai 'sirāj'
sidq-e-dil siiñ adab hai tark-e-adab

vo raqs-e-sho.ala vo soz-o-gudāz-e-parvāna
jidhar charāġh haiñ raushan ajiib aalam hai

itnī sī baat par ki huī sham.a be-hijāb
tayyār jaan dene ko parvāna ho gayā

gar ijāzat ho to parvāna kī tarah
sadqa hone ko tumhāre aa.iye

sham-e-mahfil ho yā ki parvāna
vo bhī jaltī hai ye bhī jaltā hai

gayā qarīb jo parvāna rah gayā jal kar
jamāl ḳhaas hadoñ tak jamāl hotā hai

bazm meñ jal kar kiyā shab rāz-e-ulfat āshkār
sham.a ke mānind parvāna bhī nañgā ho gayā

maut bhī sāmne aa jaa.e to parvā na kareñ
jāñ-ba-kaf dil ko misāl-e-dil-e-parvāna kareñ

sham.a kuchh jaltī nahīñ parvāna bhī detā hai jī
sozish-e-ulfat se hai jī kā zarar donoñ taraf

tū kisī shakl meñ ho maiñ tirā shaidā.ī huuñ terā saudā.ī huuñ
tū agar sham.a hai ai dost maiñ parvāna tirā ya.anī dīvāna tirā

vasl ik parda-nashīñ se hai na ho ġhair kā daḳhl
sham.a tak aa.e na parvāne kā par aaj kī raat

jalnā lagan meñ sham.a-sifat saḳht kaam hai
parvāna juuñ shitāb abas jī diyā to kyā

shola-e-sham.a se ḳhākistar-e-parvāna tak
ek hī silsila-e-soz-e-darūñ hai ki nahīñ

husn o ishq kī laag meñ aksar chheḌ udhar se hotī hai
sham.a kī sho.ala jab lahrā.ī uḌ ke chalā parvāna bhī

mukammal kar gayā jal kar hayāt-e-ġham ko parvāna
aur ik ham the ki afsāna bhī chhoḌā nā-tamām apnā

hai sham.a sar ke bal jo mohabbat meñ garm ho
parvāna apne dil se ye kahtā hai jal ke chal

fusūn-e-yak-dilī hai lazzat-e-bedād dushman par
ki vajd-e-barq juuñ parvāna bāl-afshāñ hai ḳhirman par

chhoTe chhoTe do varaq jal jal ke daftar ban ga.e
dars-e-hasrat de rahā thā jo par-e-parvāna thā

gul pe bulbul thā kahīñ sham.a pe parvāna thā
ham ne har rañg meñ dekhā tire parvāne ko