Tags-Peace

is dasht-e-halākat se guzar kaun karegā
be-amn ḳharāboñ meñ safar kaun karegā

tund-ḳhū maujoñ ne 'sājid' chāñd sāhil khā liye
bahr-e-shab meñ amn kī koshish bahut mahñgī paḌī

bas amn kā sūraj muskā.e
har samt ujālā phailā.e

huzūr chhoḌiye ye amn-o-vamn kī bāteñ
siyāsī logoñ kā dhandā ḳharāb hotā hai

jañg kā shor bhī kuchh der to tham saktā hai
phir se ik amn kī afvāh uḌā dī jaa.e

TuuTī mez aur jalī kitābeñ rah jā.eñgī
drone giregā amn kī bāteñ rah jā.eñgī

amn thā pyaar thā mohabbat thā
rañg thā nuur thā navā thā firāq

sāya-e-amn-o-amāñ meñ āshnā sote rahe
ham tan-e-tanhā ye ambār-e-malāmat le ga.e

ham amn chāhte haiñ magar zulm ke ḳhilāf
gar jañg lāzmī hai to phir jañg hī sahī

āshtī amn mohabbat ke parastār sabhī
jazba-e-mehr-o-mohabbat se haiñ sarshār sabhī

maiñ samajhtā huuñ ki donoñ hī haiñ juzv-e-kā.enāt
jañg-o-shar apnī jagah amn-o-amāñ apnī jagah

zehn o dil kī vādī-e-pur-amn meñ
gūñjtī kis kī sadā hai mustaqil

na paayā amn musalmān se na kāfir se
kahīñ huā maiñ zabīha kahīñ huā jhaTkā

aivānoñ meñ amn-o-aḳhūvvat kī jo bāteñ karte haiñ
apnā apnā dāman dekheñ kashmīr-o-panjāb ke saath

uTho phir aa rahe haiñ sab tumheñ lalkārne vaale
kisī ke haath meñ bhī amn kā parcham nahīñ hogā

kahā ye maiñ ne zamīn par amn ho sakegā
kahā ki hāthoñ meñ alam rakhnā kitāb rakhnā

pahle pahle maiñ bhī thā amn o amaañ kā mo'tarif
aur phir aisā huā nezoñ pe sar achchhe lage

kareñge amn kī bāteñ diloñ meñ buġhz rakkheñge
yahī rasm-e-jahāñ aur fitrat-e-aqvām hai saaqī

amn kā qāfila kartā rahā minnat phir bhī
chand lamhoñ ko bhī ḳhāmosh na baiThe ham log

tire shahr-e-amn kā kyā kaheñ ki har ik makān judā sā hai
haiñ daroñ pe qufl lage hue sar-e-tāq diip bujhā sā hai