Tags-Peace

chalo amn-o-amāñ hai mai-kade meñ
vahīñ kuchh pal Thahar kar dekhte haiñ

amn kī kar ḳhairāt atā mere maulā
jañg-o-jadal ko duur haTā mere maulā

surḳhiyāñ amn kī talqīn meñ masrūf rahīñ
harf bārūd ugalte rahe aḳhbār ke beach

har saañs se dars-e-aman diyā har jabr pe dād-e-ulfat dī
qātil ko bhī gar lab hil na sake āñkhoñ se duā-e-rahmat dī

tū amn kā aur sulh kā armān banegā
insān kī aulād hai insān banegā

log kahte haiñ ye amn kī jañg hai
amn kī jañg meñ hamla-āvar

hamesha amn nahīñ hotā fāḳhtāoñ meñ
kabhī-kabhār uqāboñ se bhī kalām karo

bāhar kā shor itnā garāñ thā ki bahr-e-amn
har shaḳhs apnī zaat ke andar chalā gayā

razm-gāh-e-jahāñ ban ga.ī jā-e-aman-o-amāñ
hai yahī vaqt kī rāgnī so raho so raho

ġharīb maaoñ sharīf bahnoñ ko aman-o-izzat kī zindagī de
jinheñ atā kī hai tū ne tāqat unheñ hidāyat kī raushnī de

amn ke saare sapne jhūTe
sapnoñ kī ta.abīreñ jhūTī

vo fāḳhta jise laanā thā amn kā paiġhām
uḌī nahīñ thī ki us ne uqaab dekh liyā

ye bhī aslāf kī tahzīb hai 'az.har' maiñ yahāñ
apnā kirdār tamām amn-e-amāñ tak dekhūñ

amn kā qatl ho gayā jab se
shahr ab bad-havās rahtā hai

sunā hai amn-parastoñ kā vo ilāqa hai
vahīñ shikār kabūtar huā to kaise huā

amn-e-jahāñ ko jhoñk dī apnī javāniyāñ
is se ziyāda 'dīp' bhalā aur kyā kareñ

ek kāñTā jo nikaltā hai to sau chubhte haiñ
amn thā hausla-e-fikr-o-nazar hone tak

gul-bār ridā-e-āzādī sarshār javānī kā parcham
ye amn ke naġhmoñ kā mutrib ḳhāmosh baġhāvat kā ye alam

ye amn kā lahrātā gesū ye sidq-o-mohabbat kā darpan
ai sub.h-e-vatan ai sub.h-e-vatan

shāyad ki 'salīm' amn kī sūrat nazar aatī
ham log agar shola-bayānī se nikalte