Tags-Philosophical

lafz tartīb se rakhtā huuñ maiñ tamsīl ke saath
kaun kartā hai bayāñ falsafa tafsīl ke saath

be-fasl hai be-zamāñ hai tū bhī
kahtī hai ye falsafa-tarāzī

ham apnī barahnagī chhupāte phirte haiñ
aisī hālat meñ ta.āruf kā falsafa

falsafa ḳhauf dukh ḳhushī kuchh sher
rahte haiñ itne aadmī mujh meñ

kare kyuuñ asar na 'hairat' ye ġhazal tirī diloñ par
ye navā-e-sāz-e-dil hai koī falsafa nahīñ hai

ik tirā naam hī bas mujhe yaad hai
āj-kal ye mirā falsafa ho gayā

sunā do ahl-e-vafā ko ye falsafa 'qaisar'
junūñ ne hosh kī duniyā ko āgahī baḳhshī

falsafa sar-ba-garebāñ hai baḌī muddat se
kuchh na hotā to ḳhudā jaane ki phir kyā hotā

lauT kar to aa.e ho tajraboñ kī sūrat hai
par mirī kahānī se falsafa alag rakhnā

jo ḳhvāb dekhe haiñ dil un se kyuuñ ulajhtā hai
maiñ ab ye falsafa shāyad samajh na pā.ūñgī

'sadā' ke paas hai duniyā kā tajraba vaa.iz
tumhārī baat meñ bas falsafa kitāb kā hai

us ek kachchī sī umr vaalī ke falsafe ko koī na samjhā
jab us ke kamre se laash niklī ḳhutūt nikle to log samjhe

ye janāb-e-shaiḳh kā falsafa hai ajiib saare jahān se
jo vahāñ piyo to halāl hai jo yahāñ piyo to harām hai

kuchh nahīñ kār-e-falak hādsa-pāshī ke sivā
falsafa kuchh nahīñ alfāz-tarāshī ke sivā

suḳhan mirā kaif-e-dil hai 'nātiq' vo qadr karte haiñ jo ho āshiq
nahīñ hai ye falsafa kitābī ye iktisābī hunar nahīñ hai

kis se pūchhūñ bhalā-burā kyā hai
zindagī terā falsafa kyā hai

āgahī dānish duā jazba aqīda falsafa
itnī qabreñ haa.e kis kis par diyā raushan kareñ

falsafa zindagī kā mat pūchho
maiñ kahūñgā baḌī ajiib sī baat

ye falsafa ye siyāsat ye hikmat-o-dānish
kahāñ kahāñ mirī ḳhātir kamand-o-dām nahīñ

maiñ jab tifl-e-maktab thaa, har baat, har falsafa jāntā thā
khaḌe ho ke mimbar pe pahroñ salātīn-e-pārīn-o-hāzir