Tags-Phool

mahfil meñ phuul ḳhushiyoñ ke jo bāñTtā rahā
tanhā.ī meñ milā to bahut hī udaas thā

maiñ ne taz.īn-e-chaman ke liye ḳhuuñ apnā diyā
paa.e phuul auroñ ne hisse meñ mire ḳhaar aa.e

apne dukhoñ pe tanz koī khel to na thā
zaḳhmoñ ko phuul kah ga.e ham vaz.a-dār log

ham to vo phuul jo shāḳhoñ pe ye socheñ pahroñ
kyuuñ sabā bhuul ga.ī apnā chalan bhī ab ke

is shahr kī pahchān thiiñ vo phuul sī āñkheñ
ab yuuñ hai ki un āñkhoñ kā charchā bhī nahīñ hai

zarā phuul se paañv maile na hoñge
tum aao ham āñkheñ bichhā.e hue haiñ

phuul kitne khile the dil meñ magar
ik vahīñ zaḳhm kā nishān bhī thā

phuul ḳhud apne husn meñ gum hai
us ko kab chāhne kī fursat hai

phuul pe jab ik titlī dekhī apnī javānī yaad aa.ī
aaj na jaane phir kyuuñ mujh ko apnī kahānī yaad aa.ī

ret ḳhvāboñ kī ho ki dard ke phuul
apnī jholī meñ kuchh bharo baabā

ab apne zaḳhm nazar aa rahe haiñ phuul mujhe
shu.ūr-e-dard pashemān hone vaalā hai

ḳharāb mausam meñ har shajar se larazte pattoñ ne kyā kahā thā
ki phuul aane lage haiñ ab shāḳh par bahut der ba.ad jā kar

bas bahut hausla rakhne kī kahānī kah lī
raat ko phuul masaltī hai havā bhī taaza

bāteñ karne meñ phuul jhaḌte haiñ
barq girtī hai muskurāne meñ

phūloñ kī jā pyāla ho labrez phuul se
tiijā hai mai-kasho 'qalaq'-e-bāda-ḳhvār kā

phuul khile haiñ gulshan gulshan
lekin apnā apnā dāman

aag lagī hai man ke bāhar kyā kahiye
phuul khile haiñ man ke andar zindābād

khil ke raheñge dekhnā chaar sū raushnī ke phuul
raat ke dasht kī taraf naqsh-gar-e-sahar ga.e

jo phuul saare gulistāñ meñ sab se achchhā ho
faroġh-e-nūr ho jis se fazā-e-rañgīñ meñ

ek ik phuul ko ek ek kalī ko dekhā
haar meñ un ke hamārā dil-e-nāshād nahīñ