Tags-Phool

ab rāh-e-vafā ke patthar ko ham phuul nahīñ samjheñge kabhī
pahle hī qadam par Thes lagī dil TuuT gayā achchhā hī huā

sirf āfāt na thiiñ zāt-e-ilāhī kā subūt
phuul bhī dasht meñ the hashr bhī jazbāt meñ the

tanhā.iyoñ ke gahre samundar meñ Duub jā
zaḳhmoñ ke phuul dard ke gauhar talāsh kar

tamām gulshan-e-imkāñ nisār hai tujh par
magar vo phuul jo mahkār tak nahīñ pahuñche

hamīñ meñ kyuuñ hadaf-e-tanz ai jamāl-e-bahār
sabhī ne phuul chune the tirī qabā ke liye

talab rahe to mahakte haiñ chāhatoñ ke phuul
talab miTe to sila kaisā phir vafāoñ kā

ab ke ham bichhḌe to shāyad kabhī ḳhvāboñ meñ mileñ
jis tarah sūkhe hue phuul kitāboñ meñ mileñ

ye rañg kyuuñ nahīñ jachte mirī nigāhoñ meñ
ye phuul kyuuñ mujhe lagte haiñ ḳhaar ab ke baras

shaam ko zindagī karne vaale rañg-birañge phuul
phuul vo saare rah ga.e pyāre dariyā ke us paar

khile hue haiñ phuul sitāre dariyā ke us paar
achchhe log base haiñ saare dariyā ke us paar

phir to rahnā hī hai ghūre kā muqaddar ho kar
phuul taaza hai abhī reshmī bāloñ meñ rahe

phuul to majbūriyoñ meñ khil rahe haiñ
baaġh meñ kāñToñ ko paalā jā rahā hai

terī qismat meñ tahī-dāmāñ hī rahnā thā 'qadīr'
varna us ne anjuman meñ phuul barsā.e bahut

āñchal mire bhar ke phaT rahe haiñ
phuul us ke liye chunūñ kahāñ tak

phir chaman meñ rahegā hañgāma
phir nayā phuul koī aayā hai

dikhā ke phuul se chehre ko dil liyā ḳhush ho
jo badle gul ke mile andalīb sastī hai

maġhrūr na ho fazl-e-ḳhizāñ aa ke chaman meñ
aise bhī haiñ kuchh phuul jo murjhā nahīñ sakte

khilte haiñ chand phuul bayābāñ meñ be-sabab
girte haiñ kuchh daraḳht havā ke baġhair bhī

mere haath meñ jab se us kā haath aayā hai
ḳhaar ko phuul aur phuul ko ḳhushbū kar letā huuñ

maiñ ne rakhā thā jahāñ par phuul tere naam kā
is zamīñ kā utnā hissa ab chaman lagne lagā