Tags-Phool

vahāñ maiñ jā.ūñ magar kuchh mirā bhalā bhī to ho
vo phuul bāġh-e-badan meñ khilā huā bhī to ho

ye bikhre taare ye be-nazm phuul shāhid haiñ
numūd-e-husn meñ pābandī-e-usūl nahīñ

mirī nigāhoñ meñ phir rahā hai tirā takallum tirā tabassum
mirī nigāhoñ se koī pūchhe ye phuul kyā hai bahār kyā hai

rukūñgā jā ke kisī ḳhūb-rū kī chaukhaT par
galī meñ phuul khilātā huā duā se maiñ

āñsuoñ meñ bhigo ke rakhte the
phuul to phir bhī suukh jaate the

harf ke phuul chun ke laate the
roz taaza ġhazal sunāte the

munjamid haiñ barf meñ kuchh aag ke paikar abhī
maqbaroñ kī chādareñ haiñ phuul jaisī aurteñ

judā.iyāñ to muqaddar haiñ lekin ik ġham-e-hijr
ajiib phuul se sāthī bikhar ga.e ab ke

jo yād-e-yār se guft-o-shunīd kar lī hai
to goyā phuul se ḳhushbū kashīd kar lī hai

aah us kī be-niyāzī kī nazar
aarzū kyā phuul sī kumhlā ga.ī

dil meñ liye phirte haiñ bas itnī sī ye ḳhvāhish
bāloñ meñ tire phuul lagā leñ koī ham bhī

huuñ band ḳhayāloñ meñ ki juuñ phuul meñ ḳhushbū
āzāda-ravī meñ sifat-e-mauj-e-sabā huuñ

tum rañg meñ dekho to huuñ murjhāyā huā phuul
āvāz meñ maiñ TūTte shīshe kī sadā huuñ

tumhāre hoñT se nikle har ek lafz kī ḳhair
ki jaise un pe gulāboñ ke phuul vaare ga.e

khilne lage haiñ phuul aur patte hare hue
lagte haiñ peḌ saare ke saare bhare hue

kuchh husn ke fasāne tartīb de rahā huuñ
daftar ulaT rahā huuñ har phuul har kalī kā

ye aql vaale isī tarah se hameñ fareb-e-kamāl deñge
junūñ ke dāman se phuul chun kar ḳhirad ke dāman meñ Daal deñge

koī jā kar ḳhizāñ se kah aa.e
phuul gulshan meñ phir nikharte haiñ

vo phuul toḌe hameñ koī e'tirāz nahīñ
magar vo toḌ ke ḳhushbū nikāl letā hai

koī khiltā huā chehrā koī ġhuncha koī phuul
aañkh sairāb huī ho to ġhazal hotī hai