Tags-Phool

ye rañg be-rañg saare manzar haiñ ek jaise
ye phuul saare ye saare nashtar haiñ ek jaise

kaun sā phuul sajegā tire juuḌe meñ bhalā
is shash-o-panj meñ gulzār uThā lā.eñge

sub.h ke phuul ko hañstā pā kar
raat kī aañkh meñ kāñTā dekhūñ

jis ko tum ne kahā thā aaogī
phuul pakḌe vo ab bhī Thahrā hai

haañ usī ne phuul Tāñke hoñge in ashjār par
jis ne miTTī ko diyā hai jubba dhānī rañg kā

koī chehra nahīñ ḳhushbū kā lekin
tamāshā phuul vāloñ kā lagā hai

sulag uThī hai tirī yaad meñ fazā-e-ḳhayāl
ki jaise tīrgī-e-shab meñ phuul khilte haiñ

tire badan kī sabā kis chaman meñ chaltī hai
kahāñ pe ab tire hoñToñ ke phuul khilte haiñ

saaqī kī ik nigāh ke afsāne ban ga.e
kuchh phuul TuuT kar mire paimāne ban ga.e

bikhar gayā hai phuul to hamīñ se pūchh-gachh huī
hisāb bāġhbāñ se hai kiyā-dharā havā kā thā

vaqt ne aisī karvaT badlī phuul khile bastī ujḌī
vahshat kā vo zor baḌhā ābād huā vīrāna bhī

tamām din kī tamāzat ke ba.ad raat ga.e
girī jo phuul pe shabnam havā ne raqs kiyā

us kī zulfoñ meñ abhī phuul lagānā thā mujhe
aur ruḳhsār pe ik chāñd banānā thā mujhe

vo pyaar bharī ik manzil thī tā-hadd-e-nazar the phuul khile
tan-man meñ jvālā bharte the manzar rañgīle yaad karo

hasrat hai koī ġhuncha hameñ pyaar se dekhe
armāñ hai koī phuul hameñ dil se pukāre

le uḌe phuul se ḳhushbū ko fazā mahkā.e
koī kar ke to ye dikhlā.e magar tum sā kahāñ

shāḳh-e-ehsās pe jo phuul khile haiñ un ko
zindagī husn kā idrāk baḌhāne se milī

lab jo yaad aa.e to bosoñ kī ḳhalish jaag uThī
phuul mahke to mujhe be-chamnī yaad aa.ī

us se kyā pūchhte ham apne ma.ānī 'manzūr'
phuul khilte nahīñ dekhe kisī banjar meñ kabhī

tamām-umr kā hāsil hañsī ghaḌī-bhar kī
kahāñ se laa.e koī phuul kā jigar yaaro