Tags-Phool

raheñ dardoñ kī chaukiyāñ chaukas
phuul lohe kī baaḌ par bhī khilā

phuul murjhā na jaa.eñ bajroñ meñ
māñjhiyo koī giit sāhil kā

merī mānind ḳhud-nigar tanhā
ye surāhī meñ phuul nargis kā

sahn-e-chaman meñ har-sū patthar
phuul to phuul hai ḳhushbū patthar

chalte ho to chaman ko chaliye kahte haiñ ki bahārāñ hai
paat hare haiñ phuul khile haiñ kam kam bād-o-bārāñ hai

lahū lahū nazar aatī hai shāḳh-e-gul mujh ko
khile vo phuul tirī taaza inqilābī se

dekhne vaalā har ik shaḳhs yahī kahtā hai
phuul sūkhe bhī lageñ achchhe mirī āñkhoñ se

khil rahe haiñ mujh meñ duniyā ke sabhī nāyāb phuul
itnī sarkash ḳhaak ko kis abr ne nam kar diyā

maiñ ne chune haiñ apnī hī marzī ke chand phuul
varna to mere hisse meñ puurī ḳhudā.ī thī

vaadī meñ har-sū ugne lage pāniyoñ ke phuul
chashme pe koī husn-bharī aa nahā.ī thī

andar kā baaġh jis kā badal jaa.e dasht meñ
vo shaḳhs tere phuul se chehre ko kyā kare

ab izn ho to tirī zulf meñ piro deñ phuul
ki āsmāñ ke sitāre to isti.āre the

mat ho ai dil tuuñ sadā bulbul hazāroñ phuul kā
ek baaqī būjhiye baaqī kuuñ faanī kījiye

terī ḳhushbū se mire dil meñ khile dard ke phuul
so ga.ī thī jo balā phir se jagā dī tū ne

shāḳh par ek phuul bhī 'tābish'
mujh se milne bahār meñ aayā

pyaar itnā karo ki patthar bhī
aise pighle ki phuul ho jaa.e

har ek shāḳh ke hāthoñ meñ phuul mahkeñge
ḳhizāñ kā peḌ bhī kapḌe badalnā chāhtā hai

aap ke saath muskurāne meñ
zindagī ek phuul hotī hai

ek hathelī par us ne mahkā.e hinā kī sundar phuul
ek hathelī kī qismat meñ likkhā dasht lakīroñ kā

ik muddat se qarya-e-jāñ meñ jhaḌte haiñ jhankār ke phuul
jaise mere jism ke andar mausam ho zanjīroñ kā