Tags-Phool

ye jism tañg hai siine meñ bhī lahū kam hai
dil ab vo phuul hai jis meñ ki rañg-o-bū kam hai

maiñ samā jā.ūñgā ḳhushbū kī tarah har phuul meñ
pattī pattī ġhuncha ġhuncha rūnumā ho jā.ūñgā

phuul ban jā.eñgī sūraj kī dahaktī kirneñ
dasht meñ rañg-e-gulistāñ kī tarah vāpas aa

murjhā ke bhī ga.ī na mahak jism-e-nāz kī
ye motiye ke phuul koī kāġhzī na the

dil koī phuul nahīñ aur sitāra bhī nahīñ
kār-e-duniyā kā nahīñ aur tumhārā bhī nahīñ

kashish thī phuul sī is meñ to lā-muhāla mujhe
asīr-e-rañg giraftār-e-bū bhī honā thā

thī husn kī chhab ik ajab adā jab phuul sā chehra mahak uThā
vo manzar mujh ko jachā bahut phir umr usī meñ basar huī

us sañg-e-dil ke paas kahāñ the vafā ke phuul
'anvar-sadīd' jis ko sadā pūjtā rahā

jo phuul jhaḌ ga.e the jo aañsū bikhar ga.e
ḳhāk-e-chaman se un kā patā pūchhtā rahā

siyāh phuul khilā dhuup kī muñDeroñ par
havā meñ Taañg diyā kis ne pairahan merā

maiñ kis kā naam na luuñ aur naam luuñ kis kā
hazāroñ phuul khile the ḳhizāñ ke hote hue

burrish-e-teġh bhī hai phuul kī mahkār bhī hai
vo ḳhamoshī ki jo sad maujib-e-iz.hār bhī hai

ab ke baras to shāḳhoñ pe phal-phūl khileñ
dhartī ko gulzār banā mere maulā

rañg har phuul meñ hai husn-e-ḳhud-ārā.ī kā
chaman-e-dahr hai mahzar tirī yaktā.ī kā

phuul aur phal to taaza koñpal par aate haiñ
piilā patta is vahshat meñ TuuT rahā hai

yā-rab karam kī bārish ik baar aisī kar de
har phuul ko chaman meñ hañstā huā maiñ dekhūñ

sochiye phuul khilā hai kyā kyā
sūrat-e-sañg na dekhā kiije

khañDar samajh ke mirī sair karne aayā thā
gayā to mausam-e-ġham phuul dhar gayā mujh meñ

ek patthar ki dast-e-yār meñ hai
phuul banñe ke intizār meñ hai

jab ki be-rañg rahe baaġh bahāroñ meñ 'shahāb'
tere jañgal meñ khile phuul ḳhizāñ hote hue