Tags-Phool

dil hai dozaḳh meñ kuchh is tarah tabassum-bar-lab
jaise kāñToñ meñ koī phuul khilā hotā hai

yuuñ lage dost tirā mujh se ḳhafā ho jaanā
jis tarah phuul se ḳhushbū kā judā ho jaanā

bharī paḌī hai ufūnat se inch inch zamīñ
us ek phuul se ḳhushbū kidhar kidhar jaa.e

be-ruḳhī bhī to bajā hai lekin
phuul kyā chiiz haiñ ḳhāroñ ke sivā

phir se shāḳh-e-dār par khilne lageñ laale ke phuul
phir se duniyā jaag uTThe koī aisā bhī to ho

barg-e-āvāra havā nā-āshnā be-mehr phuul
aate jaate mausamoñ meñ koī Thahrā bhī to ho

phuul kal the to aaj patthar haiñ
ye bhī andāz hai satā.ish kā

phuul Tāñkūñ libās meñ us ke
maiñ agar dastkār ho jā.ūñ

mashām-e-jāñ pe ḳhushbuoñ kī jab phuvār hī na ho
hazār baat baat meñ vo phuul Tāñktā rahe

tū hī vo phuul hai jo hai mahbūb
patte patte kā Daalī Daalī kā

phuul nāyāb sahī zaḳhm to nāyāb nahīñ
aaj bhī dil se vahī āb-o-havā kā rishta

hamārī shāḳhoñ pe bas ḳhaar bach ga.e the 'safīr'
hamāre phuul ḳhizāoñ ke haath lag ga.e the

kise batā.eñ ki ham ne pilā ke ḳhūn-e-jigar
chaman meñ phuul khilā.e tirī qabā ke liye

gul-badan kab tū un ko toḌegā
phuul thakne lage haiñ khil khil ke

mujhe bhuul ke nādim mat honā ai aglī nasloñ ke bachcho
haañ apne buzurgoñ kā mātam kabhī taaza phuul nahīñ karte

baaġh meñ gulchīñ hai na hai maalī bijlī hai na falak pe sahāb
ahd-e-ḳhizāñ meñ jalā hai nasheman aa ke kahāñ se phuul paḌā

pher jo paḌnā thā qismat meñ vo hasb-e-ma.amūl paḌā
ḳhanda-e-gul se uḌā vo sharāra ḳhirman-e-dil par phuul paḌā

har taraf phuul haqīqat ke khile haiñ lekin
aañkh meñ ḳhvāb-e-haqīqat ke sivā kuchh bhī nahīñ

vo mel-jol husn o basīrat meñ ab kahāñ
jo silsila thā phuul kā patthar se kaT gayā

vo phuul sar chaḌhā jo chaman se nikal gayā
izzat use milī jo vatan se nikal gayā