Tags-Phool

khule haiñ dāġhoñ ke phuul tan par bahār-e-tāza hai ai gul-e-tar
kabhī to merī taraf nazar kar chaman meñ kyā shāḳh-e-za.afrān hai

thā kabhī daur-e-asīrān-e-qafas ai sayyād
ab to ik phuul kī muhtāj haiñ gulshan kaisā

chhuT ke us phuul se barbād paḌe phirte haiñ
ham to ab tā.ir-e-nighat haiñ nasheman kaisā

kyuuñ na apnī ḳhūbi-e-qismat pe itrātī havā
phuul jaise ik badan ko chhū kar aa.ī thī havā

na phuul murġh-e-chaman apnī ḳhush-navā.ī par
javāb haiñ mire naale tire tarāne ke

tumhāre vasl ko va.adoñ meñ rakh diyā maiñ ne
ki jaise phuul kitāboñ meñ rakh diyā maiñ ne

'sīmāb' phuul ugeñ lahad-e-andalīb se
itnī to zindagī ho havā-e-bahār meñ

shāyad jagah nasīb ho us gul ke haar meñ
maiñ phuul ban ke ā.ūñgā ab kī bahār meñ

tujhe mire liye nīndoñ ke phuul laane the
ye kaisā āñkhoñ ko baḳhshā hai ratjagā tū ne

kaliyāñ udaas phuul fasurda sabā ḳhamosh
ab ke chaman pe rañg-e-ḳhizāñ der tak rahā

sub.h-dam
khil uThe chāroñ taraf bachchoñ ke rañgīñ qahqahoñ aur tāliyoñ ke shoḳh phuul

har rañg hai tere aage phīkā
mahtāb hai phuul chāñdnī kā

ye chīthaḌoñ meñ phuul ye sargarm-e-kār log
ye dopahar kī dhuup ye jaltī huī havā

chaman-zār-e-tamannā kā faqat ik phuul murjhāyā
usī din se mire gulshan kī vīrānī nahīñ jaatī

jī kahtā hai kāñToñ ko bhī hoñToñ se lagā luuñ
har phuul se aatī hai lab-e-yār kī ḳhushbū

chandā chamke kaliyāñ chaTkīñ phuul khileñ
jis din us ko dekheñ ḳhvāb ajab dekheñ

kalī hai mohr-ba-lab phuul hai garebāñ chaak
ajal kī dhuup hai phirtī hai saa.e saa.e sabā

uñgliyāñ chhūte hī jal jaa.eñ
phuul ke andar sho.ale dekho

kyā chhupeñ ḳhushbueñ rusvā.ī kī
pyaar ke phuul mahakte haiñ bahut

us ke ruḳhsār pe bārish kī vo halkī būñdeñ
phuul par qatra-e-shabnam kā nazārā bhī hai