Tags-Phool

us ne pheñkā thā agar phuul 'rashīd'
phir ye kis samt se patthar aayā

vo phuul aur kisī shāḳh par nahīñ khulnā
vo zulf sirf mire haath se sañvarnī hai

hamāre gaañv kā har phuul marne vaalā hai
ab us galī se vo ḳhushbū nahīñ guzarnī hai

yahī bahut hai ḳhizāñ ko ḳhizāñ jo kahte haiñ
kuchh aise phuul hameñ zeb-e-gulsitāñ to mile

shāḳh-e-dil par na khilā ab ke baras ek bhī phuul
kaisā ābād thā ye baaġh jo vīrān huā

shabnamī dhuup ke āñchal meñ sitāre haiñ bahut
chāñdnī āñkhoñ meñ kuchh phuul suhāne rakh le

chheḌte haiñ pā ke mauqa un ke utre haar bhī
bante haiñ kyuuñ dil hamārā phuul murjhāne ke ba.ad

chāñdī kā ik phuul gale meñ
haath meñ bādal kā TukḌā thā

pas-e-dafn bhī na sukūñ milā tah-e-ḳhāk hasrat-e-ishq ko
kabhī sabza ban ke lahak uThī kabhī phuul ban ke mahak ga.ī

tamāsha ham bhī apnī bebasī kā dekh lete haiñ
tirī yādoñ ke phūloñ ko sajā kar phūl-dānoñ meñ

uksā rahī hai koī ḳhalish der se mujhe
rakh dil sā phuul ḳhār-e-tamannā ke sāmne

ghar meñ gul-dān sajā.e haiñ tirī aamad par
aur ik phuul bahāne se alag rakkhā hai

ye phuul chaman ko kyā sañvāreñ saaqī
kāñToñ meñ ulajh ga.iiñ bahāreñ saaqī

dahshat ke havāle se pareshān kabhī thā
har shāḳh meñ ab phuul khilā dekh ke chup hai

na phal na phuul na saayā shajar meñ baaqī hai
magar vo sūkhā huā peḌ ghar meñ baaqī hai

ab tak tire hoñToñ pe tabassum kā gumāñ hai
ham ko to hai mahbūb yahī ādh-khilā phuul

phuul phuul bām-o-dar rāste haiñ gul-paikar
vo udhar se guzre the yā bahār aa.ī thī

aap bhī ro.eñge shāyad zār-zār
phuul jaisī ye hañsī miT jā.egī

jo bulātī thī mujhe sehn-e-gulistāñ kī taraf
phuul kī ḳhushbū nahīñ thī barq kā āvāza thā