Tags-Phool

meñh barastā hai to dhartī kī nazar jhūmtī hai
phuul khilte haiñ to gulshan pe nikhār aatā hai

sunā hai us kī manzūrī bahar-sūrat zarūrī hai
usī ke hukm se is aarzū ke phuul khilte haiñ

ek paude ke phuul haiñ lekin
hai judā Daal Daal kī ḳhushbū

phuul se aa rahī hai jo sab ko
asl meñ hai nihāl kī ḳhushbū

sach kā kapḌā phuul se halkā hotā hai
jhuuT kā parvat laad ke jaanā paḌtā hai

na do ilzām bhauñre ko 'alī' tum
vo hargiz phuul kā qātil nahīñ thā

vāqif ho kyuuñ na shola-e-ātish se dil ke vo
rahtī hai bāġhbāñ ko ḳhabar phuul paat kī

fāsle kuchh qadmoñ meñ sameTe āñkhoñ meñ kuchh dhuup ke phuul
is ke alāva aur na ham ne kuchh sāmān-e-safar māñgā

terī pahchān na ban jaa.e mire ḳhuun kā daaġh
ye koī phuul nahīñ hai ise dāman se nikāl

charāġh kī oT meñ rukā hai jo ik hayūlā sā yāsmīñ kā
ye rañg hai aur āsmāñ kā ye phuul hai aur hī zamīñ kā

usī maqām pe kal mujh ko dekh kar tanhā
bahut udaas hue phuul bechne vaale

shagūfe phuul bante jā rahe haiñ
gayā mausam mirī dīvāngī kā

is gulistāñ kī yahī riit hai ai shāḳh-e-gul
tū ne jis phuul ko paalā vo parāyā hogā

phuul hī phuul haiñ kahte ho jinheñ tum kāñTe
merī duniyā-e-junūñ meñ kabhī aao to sahī

ab to is tālāb kā paanī badal do
ye kañval ke phuul kumhlāne lage haiñ

nazar is husn par Thahre to āḳhir kis tarah Thahre
kabhī ḳhud phuul ban jaa.e kabhī ruḳhsār ho jaa.e

husn hai un meñ tirā mere junūñ kā andāz
phuul bhī le ke ajab shakl o shabāhat aa.e

havā meñ ḳhushbueñ merī pahchān ban ga.ī thiiñ
maiñ apnī miTTī se phuul ban kar ubhar rahā thā

is tarah ḳhush huuñ ki ḳhvāboñ meñ vahī
phuul barsā ke ga.ī ho jaise

laa.e haiñ phuul ahl-e-mohabbat kī qabr par
kyā yaad aa gayā unheñ tark-e-jafā ke ba.ad