Tags-Phool

kabhī to shāḳh-e-ta.alluq meñ phuul ā.eñge
kabhī to sard badan ko lahū pukāregā

abhī to phuul bhī aa.e nahīñ haiñ shāḳhoñ par
abhī se bojh daraḳhtoñ pe paḌ rahā kyuuñ hai

rādhā-rānī phuul samān
harī ga.e hariyālī par

iz.hār mohabbat ke liye lāzmī nahīñ
ki phuul ḳharīde jaa.eñ

samā.at meñ abhī tak āhaToñ ke phuul khilte haiñ
koī chaltā hai dil ke darmiyāñ āhista āhista

toḌā jo phuul bulbul-e-shaidā ke sāmne
kyā tere dil meñ dard kuchh ai bāġhbāñ na thā

jab havā baaġh se kahtī hai ḳhizāñ aa.ī hai
bāġhbāñ phuul liye haat meñ mar jaate haiñ

phuul the rañg the lamhoñ kī sabāhat ham the
aise zinda the ki jiine kī alāmat ham the

shāḳh par phuul falak par koī taarā bhī nahīñ
maiñ bhī tanhā huuñ bahut koī tumhārā bhī nahīñ

na to vo phuul na kaliyāñ na vo sabza na bahār
rut kī phirtī hai chaman-zār kā taḳhta ulTā

ḳhvāja-qutbuddīñ meñ phir gaḌvā banā kar le ga.ī
ya.anī un kī nazr ko sau phuul gul laa.ī basant

apne liye tajvīz kī shamshīr-e-barhana
aur us ke liye shāḳh se ik phuul utārā

vo phuul huuñ jo khilā ho ḳhizāñ ke mausam meñ
tamām umr mujhe hasrat-e-bahār rahī

us baaġh meñ khilte haiñ abhī jhulse hue phuul
us baaġh meñ ḳhushbū ko abhī ghar na milegā

maiñ baḌhā.ūñ haath jis kāñTe kī jānib shauq se
haath meñ aa kar vo kāñTā phuul ho jaa.e to phir

tamāshā-kardanī hai dāġh-e-sīna
ye phuul is taḳhte meñ taaza khilā hai

cigareteñ chaa.e dhuāñ raat ga.e tak bahseñ
aur koī phuul sā āñchal kahīñ nam hotā hai

sirf ḳhushbū kī kamī thī ġhaur ke qābil 'qatīl'
varna gulshan meñ koī bhī phuul murjhāyā na thā

ham kahīñ bhī hoñ magar ye chhuTTīyāñ rah jā.eñgī
phuul sab le jā.eñge par pattiyāñ rah jā.eñgī

mirī sub.h-e-ḳhvāb ke shahr par yahī ik javāz hai jabr kā
ki mire vajūd ke baaġh meñ abhī koī phuul hai sabr kā