Tags-Phool

sunī-sunā.ī baat nahīñ ye apne upar biitī hai
phuul nikalte haiñ sho.aloñ se chāhat aag lagā.e to

shafaq dhanak mahtāb ghaTā.eñ taare naġhme bijlī phuul
is dāman meñ kyā kyā kuchh hai dāman haath meñ aa.e to

shaguftagī kā ishāra hai phuul barseñge
na jaane aaj navāze-gī shāḳh-e-dār kise

dast-e-imkāñ meñ koī phuul khilāyā jaa.e
ḳhema-e-ḳhvāb meñ ta.abīr ko laayā jaa.e

lams mumkin nahīñ sho.ale kā binā ḳhaak hue
phuul ho sirf to siine se lagā.ūñ us ko

ugaltā bulbule phuul aur shole
vo chābī ke khilaune kī tarah thā

khile haiñ phuul usī rañg kī satā.ish meñ
jo be-misāl rahā aap apnī tābish meñ

is tarah bas meñ aa gayā koī
kar liyā maiñ ne phuul paan se ḳhush

phuul afsurda bulbuleñ ḳhāmosh
fasl gul aa.ī hai ḳhizāñ-bar-dosh

koī to phuul khilā.e duā ke lahje meñ
ajab tarah kī ghuTan hai havā ke lahje meñ

merā pyārā nanhā yahāñ so rahā hai
use phuul se pyaar thā

so dekh kar tire ruḳhsār o lab yaqīñ aayā
ki phuul khilte haiñ gulzār ke alāva bhī

suukh chale vo ġhunche jin se kyā kyā phuul ubharne the
ab bhī na un kī pyaas bujhī to ghar jañgal ho jā.egā

mil gayā thā baaġh meñ ma.ashūq ik nak-dār sā
rañg o rū meñ phuul kī mānind saj meñ ḳhaar sā

kaisī ādāb-e-numā.ish ne lagā.īñ sharteñ
phuul honā hī nahīñ phuul nazar aanā bhī

murjhā.e phuul sab haiñ kaliyoñ ne sar jhukā.e
gulshan meñ ik sitam hai ye terī be-naqābī

haa.e anjām kis gumāñ kā hai ye
shāḳh kuchh phuul phal ga.ī hogī

kaan meñ motī haath meñ kañgan phuul chamelī kā juuḌe meñ
kyā kyā rañg jamāne vaale āñkheñ jin se basīñ, milte haiñ

gahre surḳh gulāb kā andhā bulbul saañp ko kyā dekhegā
paas hī ugtī nāg-phanī thī saare phuul vahīñ milte haiñ

taaq meñ kaun rakh gayā ek diyā aur ek phuul
dhyān meñ phir se jal uThā ek diyā aur ek phuul