Tags-Phool

phuul kī pattī se bhī nāzuk hai kuchh dil kā mizāj
log kahte haiñ mujhe talvār honā chāhiye

bajā.e rañg rag-e-ġhuncha se lahū Tapke
khile jo phuul to har barg-e-gul sharar ho jaa.e

vahāñ salām ko aatī hai nañge paañv bahār
khile the phuul jahāñ tere muskurāne se

roz phuul toḌ kar
mez par sajā diye

chalo ab un kī bhī bastī meñ phuul baañT aa.eñ
jo thak chuke haiñ ye tīr-o-kamāñ banāte hue

hoñToñ ko phuul aañkh ko baada nahīñ kahā
tujhko tirī adā se ziyāda nahīñ kahā

vo phuul jo mire dāman se ho ga.e mansūb
ḳhudā kare unheñ bāzār kī havā na lage

phuul sā lahja huā kartā thā jis kā 'zākir'
ab vo bātoñ meñ koī baat banā detā hai

phuul haiñ sher bū-e-gul dhun hai
ham haiñ naġhma-nigār phūloñ ke

merī tanhā.iyāñ batātī haiñ
phuul hote haiñ yaar phūloñ ke

na hai 'shā.ir' ab ġham-e-nau-ba-nau na vo dāġh-e-dil na vo aarzū
jinheñ e'timād-e-bahār hai vahī phuul rañg badal ga.e

phuul se rūThtī hai kab ḳhushbū
raat se rūThtā hai kab jugnū

chhā.ī hai 'gulzār' meñ fasl-e-ḳhizāñ
phuul haiñ sab gul shamā.il ke qarīb

mire gulshan kā har ik phuul murjhāyā huā sā hai
kabhī kaliyoñ ke lab par muskurāhaT aa hī jā.egī

maslahat ham ko bhī marġhūb hai lekin kab tak
ḳhaar ko phuul kaheñ dasht ko dariyā likkheñ

ehsās meñ phuul khil rahe haiñ
patjhaḌ ke ajiib silsile haiñ

mausam-e-gul ye tirī zard sahāfat kaisī
phuul ma.asūm haiñ phūloñ se siyāsat kaisī

apne lahū se phuul khilā kar hayāt ke
har samt ḳhushbuoñ kī fazā chhoḌ jā.ūñgā

khilā thā sub.h savere jab āftāb kā phuul
diyā thā toḌ ke us ne mujhe gulāb kā phuul

kis kis phuul kī shādābī ko masḳh karoge bolo!!!
ye to us kī den hai jis ko chāhe vo mahkā.e