Tags-Phool

rah jaa.e mohabbat kā duniyā meñ bharam kuchh to
do phuul hī turbat pe dhar jaa.eñ to achchhā ho

sañg-dil huuñ is qadar āñkheñ bhigo saktā nahīñ
maiñ ki pathrīlī zamīñ meñ phuul bo saktā nahīñ

ye ik shajar ki jis pe na kāñTā na phuul hai
saa.e meñ us ke baiTh ke ronā fuzūl hai

ajnabī sabza-zāroñ meñ
hadd-e-nazar tak banafsha ke phuul

ye shāḳh-e-nūr jise zulmatoñ ne sīñchā hai
agar phalī to sharāroñ ke phuul lā.egī

sūraj kā phuul abr ke pattoñ meñ gum rahā
shab ke shajar kā saaya rahā mujh udaas par

ho ke qadmoñ pe nichhāvar phuul ne but se kahā
ḳhaak meñ mil kar bhī maiñ ḳhushbū bachā le jā.ūñgā

ab rāh-e-vafā ke patthar ko ham phuul nahīñ samjheñge kabhī
pahle hī qadam par Thes lagī dil TuuT gayā achchhā hī huā

ab ye kyuuñ zikr-e-bahārāñ pe chaman meñ akasr
phuul to phuul haiñ ḳhāroñ ko hañsī aatī hai

jab patā chaltā hai ḳhushbū kī vafādārī kā
phuul jis vaqt gulistāñ se judā hotā hai

ḳhūb-rū kaun ye aayā chaman meñ aaj ki yaañ
sharm se surḳh hue jaate haiñ ye phuul sabhī

kyuuñ apne pahāḌoñ ke sīnoñ ko jalāte ham
ḳhatra to mohabbat ke ik phuul se Tal jaatā

merī miTTī saath meñ rakh
phuul nahīñ murjhā.egā

tum ne jo phuul mujhe ruḳhsat hote vaqt diyā thā
vo nazm maiñ ne tumhārī yādoñ ke saath lifāfe meñ band kar ke rakh dī thī

phuul ban kar mahakne lagte haiñ
aap zaḳhmoñ ko yuuñ chhuā na kareñ

un phūloñ kī ab bhī yaad satātī hai
phuul jo apne hāthoñ ḳhud hī masal diye

chunte ho tīrgī meñ bhī taaza ġhazal ke phuul
kyā soch terī vāqif-e-hālāt ho ga.ī

raat bhī hai kuchh suunī suunī din bhī kuchh vīrān sā hai
phuul bhī haiñ kuchh sahme sahme baaġh bhī kuchh hairān sā hai

titliyāñ phuul parinde use lene aa.e
is se baḌh kar to pazīrā.ī nahīñ ho saktī

ek talvār hai talvār bhī do dhārī hai
zindagī phuul hai patthar se magar bhārī hai