Tags-Phool

ḳhuuñ chuus rahā hai paudoñ kā ik phuul jo ḳhandāñ hotā hai
pāmāl banā kar sabzoñ ko ik sarv ḳharāma hotā hai

toshak ke phuul ban ga.e añgāre hijr meñ
dahkā kī ek aag sī saare palañg par

use paak nazroñ se chūmnā bhī ibādatoñ meñ shumār hai
koī phuul laakh qarīb ho kabhī maiñ ne us ko chhuā nahīñ

banā ke phuul kī ḳhushbū phirā.egī sadiyoñ
havā se kaun rah-e-e'tidāl pūchhegā

aaj bahut kam phuul khile haiñ
shāyad mausam badal rahā hai

ek tabassum dekh ke tere hoñToñ par
phuul ḳhizāñ kī rut meñ khilne lagte haiñ

phuul ke saa.e meñ kāñToñ ko bhī rahne diije
sub.h kī qadr na kī jaa.e agar shaam na ho

bichhe the rāhoñ meñ phuul kitne
jo bhā gayā vo gulāb ho tum

jahān meñ haiñ subuk-bār kab shagufta-mizāj
chaman ke phuul liye bār-e-rañg-o-bū aa.e

kaḌī ho dhuup to do phuul pyaar ke hañs kar
tapsīda rāhoñ meñ shāḳh-e-shajar banāte haiñ

mausam-e-gul kī tañg-dāmānī
phuul māñge the ḳhaar paa.e haiñ

patthar hai tere haath meñ yā koī phuul hai
jab tū qubūl hai tirā sab kuchh qubūl hai

vaqt-e-ruḳhsat bhīgtī palkoñ kā manzar yaad hai
phuul sī ā.ankhoñ meñ shabnam kī namī achchhī lagī

vo bhī pahchān na paayā mujhe apnoñ kī tarah
phuul bhī kahtā hai patthar bhī batātā hai mujhe

raat vo hashr gulistāñ meñ uThā hai yaaro
subah har phuul ne shabnam se sharāre māñge

qurbat ke us peḌ kī shāḳhoñ par dekho
phuul udāsī kā hai samar afsos kā hai

titliyāñ pakaḌne meñ duur tak nikal jaanā
kitnā achchhā lagtā hai phuul jaise bachchoñ par

haa.e ḳhushbū se tire dard kī nisbat na ga.ī
maiñ ne har phuul ko siine se lagā rakkhā hai

ārzūoñ ne ka.ī phuul chune the lekin
zindagī ḳhār-badāmāñ hai ise kyā kahiye

aks ko phuul banāne meñ guzar jaatī hai
zindagī ā.ina-ḳhāne meñ guzar jaatī hai