Tags-Phool

bādal garjā bijlī chamkī roī shabnam phuul hañse
murġh-e-sahar ko hijr kī shab ke afsāne dohrāne do

chhupā hai karb-e-musalsal havā ke lahje meñ
koī to phuul khilā.e duā ke lahje meñ

muntazir the tire malbūs ke sūkhe hue phuul
vo jinheñ tere pahanñe se sañvar jaanā thā

nikal aa.e achānak ghaas meñ phuul
sitāroñ ne unheñ āvāz dī hai

lafz-o-ma.anī ke na.e phuul ubhar ā.eñge
naqsh ho jaa.e jo qirtās pe lahja apnā

ye kis kī yaad kī bārish meñ bhīgtā hai badan
ye kaisā phuul sar-e-shāḳh-e-jāñ khilā huā hai

shabāb par thā chaman intiḳhāb-e-gul kaisā
tamām phuul nazar meñ sameT laayā maiñ

jab se ik phuul se chehre ne nazar pherī hai
aisā lagtā hai ki is shahar se jaatī hai havā

bahut se chāñd aur bahut se phuul ek tajrabe meñ lage haiñ kab se
sunā hai tum ne kahīñ tumhārā javāb tayyār ho rahā hai

hijr ke daur meñ hālāt badal jaate haiñ
phuul mar jaate haiñ sab paat badal jaate haiñ

bichhaḌte dāmanoñ meñ phuul kī kuchh pattiyāñ rakh do
ta.alluq kī girāñbārī meñ thoḌī narmiyāñ rakh do

kaise phuul aur kaun se kāñTe yaad kī jholī ḳhālī hai
ab to 'tasavvur' lagne lagā hai vīrāna vīrān mujhe

jahāñ vādiyoñ meñ na.e phuul aa.e
hamārī tumhārī mulāqāt hogī

titliyāñ ban ga.iiñ phir aaj vafādār ka.ī
baaġh meñ koī nayā phuul khilā lagtā hai

phuul the bādal bhī thā aur vo hasīñ sūrat bhī thī
dil meñ lekin aur hī ik shakl kī hasrat bhī thī

sunā thā maiñ ne yahī din haiñ phuul khilne ke
mire liye to ye mausam ḳharāb hai maulā

ghar ke saare phuul hañgāmoñ kī raunaq ho ga.e
ḳhālī gul-dānoñ se bāteñ karke so jā.eñge ham

sabz titlī thī 'rāshida' māhīn
nargisī phuul par marī huī thī

us pe kyā guzrī jo is aalam meñ
phuul ko jāma-darī yaad aa.ī

sañg-e-marmar ke bel būToñ par
phuul aane kī baat karte ho